كريم عبد العزيز عن تجسيد شخصية حسن الصباح: "أنا صدقته"
أكد الفنان كريم عبد العزيز أنه كان لابد أن يصدق شخصية حسن الصباح والتي قام بتجسيدها في مسلسل الحشاشين حتى تظهر بشكل مقنع للجمهور.
وقال عبد العزيز مع مقابلة مع برنامج "كلمة أخيرة" المذاع على قناة "أون": "مهنة التمثيل أو التشخيص حضرتك تكرهني كمشاهد من خلال اللي أنا بعمله ولكن أنا كممثل مينفعش أكرهه ولو كرهته لازم اعتذر عن العمل؛ نوع التمثيل اتغير والمشاهد أصبح على دراية كبيرة جدا وبيتعرض لكم أفلام أجنبي ومصري".
وأضاف: "الموضوع زي الجاسوس لما تيجي تعمل جاسوس هل أنت جاسوس؟ أنا لازم اصدق منطقه وعشان أنت تكرهني لازم أنا أكره منطقه؛ أنا صدقت في حسن الصباح إيمانه بنفسه وإيمانه بالدعوة اللي هو فيها وصدقت انه خلي الدعوة فوق أقرب الناس ليه".
وتابع: "أنا ككريم عارف الشخصية وعارف انها طائفة إرهابية؛ أنا قريت المشهد هذا الشخص شرير اتفقنا؛ هقدمه ازاي؟ لازم أنا اصدق اللي بيقوله عشان حضرتك تكرهه؛ أنا دوري غير دور المشاهد؛ دور المشاهد أن يشوفني يكرهني ولكن دوري وأنا بشتغل أني لازم اصدق منطقه وإلا مش هقدر امسك الشخصية".
وواصل: "الممثلين اللي عملوا راسبوتين وهتلر؛ هو صدق أفكار هتلر ولكن أكيد محبوش؛ من اول ما جينا نشتغل كان في أن ضحكته بمعاد وابتسامته بمعاد؛ مثلا مشهد موت الابن قعدت أنا ودكتور بيتر الصبح قلتله عايز تعمل ايه يا دكتور؟ قالي عايز كذا وكذا وعايز احساسك وقلتله وجهة نظري ان حسن الصباح مش هيعيط خصوصا وهو في قاعة الحكم؛ هو هيعيط من جوة ولكن كحجم وداعية وقائد مش ممكن هيدمع قصاد القلعة وشباب القلعة؛ الصراع داخلي مش معلن".
واختتم: "أنا صدقت الورق وأنا فرحان أني اشتغلت مع الكاتب عبد الرحيم كمال؛ كاتب كبير جدا وجمله ورسمه للشخصية؛ اصعب لحظة عند حسن الصباح هو قتل ابنه لأن في رحلة حسن الصباح هي دي اللحظة الفاصلة؛ انا صدقت اللحظة والمشهد اتعمل مرة واحدة وأنا قلت للدكتور بيتر بعد إذن حضرتك أنا عايز أدخل على الكاميرا على طول أعمله مرة واحدة وقالي أنا جاهز".
