تامر عبد المنعم يهاجم حمو بيكا: "هنسمى القرد فنان"
أكد الفنان تامر عبد المنعم، أن مؤدي المهرجانات حمو بيكا لا يصلح للغناء، مشيرًا إلى أنه لو كان نقيبًا للموسيقيين لم يكن ليمنحه تصريحًا بالغناء.
هجوم على حمو بيكا
وقال عبد المنعم، في مقابلة مع برنامج "العرافة" المذاع على قناة "النهار": "هو مقراش اللي أنا كتبته وهما قالوا له وقالوا لي مبيعرفش يقرأ، فأنا قلتلته شوف حد يقرالك، لما ييجي عليا الزمن لما حمو بيكا يقولي نضف قلبك وشوفلك فيلم تمثله يبقى الحمد لله إني رديت الرد ده بس".
وأضاف: "أنا فنان وحمو بيكا مش فنان، الفنان لما يجيبوه عشان يبقى نمرة فكاهية في فرح عشان الناس تتفرج عليه يبقى كده نسمي القرد فنان، لما يجيبه القرداتي نجيبه ويعمل فقرة القرد".
وتابع عبد المنعم: "فنان ده كلمة كبيرة، النجوم عندنا في مصر قليلين للغاية، ولو جينا نقول مين هما النجوم في مصر هتلاقيهم عشرة خمستاشر واحد، وأكيد مش من ضمهم حمو بيكا، في نجم زي أحمد عز أو أحمد حلمي وعمرو دياب ومحمد منير".
خلاف بيكا وعمرو عبد المنعم
وواصل: "الغناء الشعبي كان محمد رشدي وكان آخره أحمد عدوية وحكيم، مش كل ما يشاهد فن وأنا لو نقيب الموسيقيين مش هديله تصريح ولو أنا الرقيب مش هخليه يعني، لما تيجي تمنعي مثلًا حد زي محمد محيي نقول إزاي وتلاقي في حد قالك إزاي دا مطرب كبير، وكان نجم في التسعينات والناس مشتقاله ده صوت ومينفعش أمنعه، دا بيقدم فن ولكن لما يكون ما يقدم استعباط وبذاءة يبقى أمنعه".
وأوضح عبد المنعم: "أنا مبحبش المهرجانات ولكن في منهم بيعرف يغني، زي عمر كمال، وحسن شاكوش أقل كتير من عمر كمال، ولكن حمو بيكا مبيعرفش يغني خالص".
ونشب خلاف بين حمو بيكا وتامر عبد المنعم منذ عدة سنوات على خلفية هجوم الأخير عليه، فيما رد حمو بيكا من خلال صفحته على موقع فيسبوك.
وكتب حمو بيكا: "ردًا على كلام المدعو تامر عبد المنعم، الحمد لله أنا مش مستني حد زيك يقولي اقرأ أو مقراش، أنا معايا إخواتي هما عيني وضهري، أنا بقى اللي بقولك شوفلك حد ينضّف قلبك من الغل والصفار والتنمّر اللي فيه".
