عاجل| مجدي عبد الغني: وضعت المصحف على التلفزيون ليكسب الأهلي (فيديو)

كشف مجدي عبد الغني نجم الأهلي السابق، حقيقة تصريحاته ضد سيد عبدالحفيظ مدير الكرة السابق بالقلعة الحمراء.

رحيل سيد عبد الحفيظ عن الأهلي

وقال عبد الغني، خلال استضافته برنامج "حبر سري" المذاع على قناة "القاهرة والناس": “أنا بحب سيد عبد الحفيظ، أنا ممكن أقوله إني أنا كابتنك، في جرايد ومواقع بتكتب من غير ما أصرح بيها، سنة الحياة أن يرحل سيد عبد الحفيظ من الأهلي، وإن ده يمشي ودا يمشي ودي سنة الحياة، هو كابتن صالح سليم فين دلوقتي الله يرحمه وكابتن حسن حمدي فين دلوقتي”.

وأضاف: "لازم يبقى في كوادر جديدة والنادي الأهلي دايمًا بيطلع كوادر وناس في الإدارة أو الكورة، ولما بطل يطلع من الناشئين بقى يشتري لاعيبة بملايين، سيد عبدالحفيظ هو الأنجح في المنصب ولكن خالد بيبو ممكن ينجح".

وتابع عبدالغني: "النادي الأهلي بينجح أي حد، النادي الأهلي ماشي لوحده، وبيكسب لوحده، ودائمًا مجالس إدارات النادي الأهلي قوية، أنا كنت بحط المصحف زمان فوق التلفزيون على جول النادي الأهلي، عشان ميدخلش فيه جول، فكر طفل وعيلتنا كلها أهلاوية، وبيتنا كله معادي أبويا، كان بيشجع الترسانة، ولكن بقى أهلاوي لما بدأت العب في الأهلي".

كأس العالم في روسيا

وواصل: "هاني أبو ريدة شالني من رئيس بعثة منتخب مصر اللي رايحة كأس العالم في روسيا؛ أنا دخلت الانتخابات بدراعي وكسبت ومخدنيش هاني أبو ريدة معاه في القايمة ولكن انا غلطت عشان لما نجحت قلت أنا مش عايز مشاكل؛ أنا هبقى مسالم ومع هاني أبو ريدة ولكن الكلام ده منفعش معاهم وكنت غلطان؛ كان لازم اخليني على موقفي".

وأوضح  نجم الأهلي السابق: "دخلت لقيت اللي عايز يدير أتحاد الكرة هما اتنين هاني أبو ريدة وأحمد مجاهد، وأنا بدأت أزاحمهم لدرجة قلت لأحمد مجاهد أنت تيجي 3 أيام وأنت 3 أيام أنا أدير الاتحاد تلات أيام وأنت تدير الاتحاد تلات أيام، واتفقنا على كده وعملنا كده، لإنه كان بيجي بيتدخل في كل حاجة".

واختتم: "أحمد مجاهد بيحب أحمد مجاهد بس، وبيحب هاني أبو ريدة، عشان وداه الاتحاد الدولي، وظبطه يعني ودي حقيقة ومسؤول عن كلامي".