شاهد.. مصطفى بكري يكشف عن تعديلات وتغييرات حكومية مقبلة
أكد الإعلامي مصطفى بكري، أن الرئيس عبد الفتاح السيسي ليس معزولًا عن الشعب المصري، مشيرًا إلى أنه يعرف جيدًا ما يعاني منه المصريين.
مواد غذائية بسعر مخفض
وقال بكري، خلال برنامج "حقائق وأسرار" المذاع على قناة "صدى البلد": "لازم كل مواطن مصري يعرف أن الرئيس عبد الفتاح مش معزول، الرئيس بيسمع أهات الشعب واتكلم أكتر من مرة عن معاناة الناس، وإننا لازم ننهي الوضع بإجراءات، وكويس إن الإجراءات اللي بتعملها الحكومة اليومين دول فيما يتعلق بالأسعار ومواجهة الغلاء، وإننا نستورد مواد غذائية ونطرحها بأسعار قليلة كل ده محتاجينه".
وأضاف: "إحنا مش هنحكم شعب أصم وأبكم، واللي ميعرفش الشعب المصري وعظمته وحضارته وثقافته يبقى بيتجاهل واقع صحيح وكل الناس عارفاه".
وتابع بكري: "بقول لكل مسؤول راعوا الشعب وضمائركم في هذا الشعب العظيم اللي تحمل وبيتحمل، الشعب المصري واعي بالتحديات وعارف كويس إيه اللي بيحصل من كل الاتجاهات الاستراتجية، وزي ما قال سيادة الرئيس مصر بتواجه تحديات من قبل زي اللي واجهتها دلوقتي في عصرها الحديث، إحنا حوالينا حزام نار من كل ناحية فالقيادة بتتعامل بحكمة وموضوعية كويس ولكن إحنا محتاجين تغييرات ووجوه تبقى أكثر حماسًا".
تغييرات قادمة
وواصل الإعلامي: "أنا اللي يهمني الرأي العام، الحكم يستقيم ويترسخ بإنه يكون هناك رأي عام عنده رضا لأنه ممكن الناس تبقى ساكتة ولكن ييجي حدث معين تضيع الدنيا، الرضاء العام مسألة مهمة جدًا وفهم الناس مسألة مهمة جدًا، وكل مسؤول لازم يعمل ده، ويراعي ضميره في الناس".
واستكمل بكري: "إحنا مرينا في رمضان، ولولا التكافل الاجتماعي اللي عملاه الناس مع بعضها ناس كتير كانت تعبت، لأن الأسعار فوق قدرة أي ناس، لهذا نحن نأمل في الفترة القادمة أن تكون فترة تغييرات واسعة للذين لا يصلحون، في ناس كويس على العين والراس؛ لتجديد الدماء وتغيير الفكر للقضاء على البيروقراطية والفساد الإداري".
وأوضح: "الرئيس مع بدايات حكمه اتكلم عن الفساد المالي والإداري، الأجهزة الرقابية شغالة في ملفات الفساد، ولكن فيما يتعلق بالفساد الإداري هو ده اللي بيفرمل كل حاجة، أنت لما تقعد على المكتب ومتشتغلش دا فساد إداري".
واختتم الإعلامي: "حركة المحافظين أعتقد أنها اكتملت الآن، وموجودة، وخلال الأيام القادمة هيظهر عندنا حركة وتغيير أو تعديل وتغييرات في حاجات كتير جدًا، زي الصحافة القومية والتلفزيون".
