شاهد| محمد ممدوح خسر 45 كيلو من وزنه بالماء: "7 لترات في اليوم"
كشف الفنان محمد ممدوح، عن تفاصيل فقدانه 45 كجم من وزنه بعدما اتبع حمية أطلق عليها "رجيم الماء" لمدة لا تزيد عن 17 يومًا.
رجيم الماء
وقال ممدوح، خلال برنامج "بيج تايم بودكاست" المذاع على قناة "إم بي سي مصر": "أنا بيوصل معايا إني بشرب 7 لترات في اليوم، وفي وقت معين لشرب الماء، الكمية بتفرق على الريق كوبايتين، مينفعش مثلًا تشرب في ساعة 3 زجاجات ماية، ولكن جاب نتيجة، والحمد لله نزلت 40 -45 كجم ونفسي اتظبط كتير".
وأضاف: "أنا مبعملش دايت إلا لو كانت في دور عايزني أخس، ودي محصلتش كتير إلا في دور أمين بمسلسل جراند أوتيل، وقررت أتخن وقتها ولكن بعدها معرفتش أخس".
وتابع الفنان: "الأكل متعة ولكن كل حاجة بتزيد عن حدها بتتقلب ضدها، أنا بدوق من هناك ومن هنا وزمان كنت بتغدى كميات متعبة، أنا مش ماشي على نظام، مش عايز أقول إني ماشي على نظام فالناس تمشي عليه".
المياه تفعل كل شيء
وأوضح ممدوح: "الماية سبحان الله بتعمل كل حاجة، كنا الصبح بنكشف والدكاترة بيكشفوا علينا وباليل بيعملوا محاضرات عن أضرار الأكل، إحنا كنا في فندق وهما مجموعة كدة بياخدوا نفسهم كل سنة يقعدوا في الأوتيل ويعملوا كده، في مشروبات بسيطة زي النعناع ممكن تشربها في نص اليوم ولكن مكنتش بعمل كده".
وعن الوظائف التي عمل بها قبل دخوله عالم الفن قال: "اشتغلت في قهوة كذا حاجة، إما بعمل الطلبات أو بنزل الطلبات، مع إن في عداوة بيني وبين النار لأن في فرن ضرب في وشي واتحرقت، كنت بفتح مشروع أكل والفرن ضرب في وشي وقعدت شهرين مفيش حاجة نجحت معايا".
واختتم الفنان: "اشتغلت برضو في سينما ميامي، كنت بقعد الناس بالكشاف، وكنت بشتغل عشان أتعلم وقابلت شخصيات كتير في حياتي اتعلمت منها كتير، شخصية أمين في جراند أوتيل قابلته مرتين في حياتي، مرة منهم في سينما ميامي، ومكانوش عارفين يتعاملوا معاه، وجابوني أنا اتعامل معاه، لإنه كان ضخم على اعتبار إننا في حجم بعض لكن بقى صديقي بعد كده".
