شاهد| إبراهيم سعيد: محمد صلاح هرب.. ودخلت الدوري الإنجليزي قبل ما حد يعرفه
أكد إبراهيم سعيد لاعب المنتخب الوطني السابق، أن محمد صلاح نجم ليفربول الإنجليزي يعد اللاعب الأفضل في تاريخ مصر لكنه ليس فوق النقد.
دخلت الدوري الإنجليزي قبله
وقال سعيد، خلال برنامج "العرافة": "دايما بقول إن محمد صلاح أفضل لاعب في تاريخ مصر ولكن هو مش فوق النقد وعلى فكرة أنا بحبه جدًا وأنا بتكلم على أي حد".
وأضاف: "أنا إبراهيم سعيد بردو مع احترامي لكل الناس، اللي شايف نفسه صغير بالنسبة لمحمد صلاح فهو شايف نفسه كده، أنا دخلت الدوري الإنجليزي قبل ما يدخله محمد صلاح أصلا، أنا أول واحد دخلت الدوري الإنجليزي قبل ما الناس تعرفه، كان دائمًا اللاعبية طموحها تروح بلجيكا أو هولندا".
وتابع لاعب المنتخب الوطني السابق: "الظروف غير الظروف، أديني الظروف وكنت هنجح، لما كنت بلعب في إيفرتون كان ليفربول بينهي الدوري في السابع والتامن والتاسع ولما كنت في إيفرتون خلصنا الدوري في المركز الخامس، أنا اول واحد دخل الدوري الإنجليزي واللاعيبة كان طموحها الدوري الفرنسي والبلجيكي".
أول لاعب في الدوري الإنجليزي
وتابع: "الظروف مساعدتنيش زي دلوقت والأمور مختلفة عن زمان، أنا أول لاعب في الدوري الإنجليزي ومحدش كان يعرف الدوري الإنجليزي غير عن طريق الصدفة ومعظم اللاعبية كان لازم تعيش تنقلات سبع سنين قبل ما تروح الدوري الإنجليزي ولكن أنا رحت من الأهلي للدوري الإنجليزي على طول".
وأوضح: "التصريحات اللي قلتها وصلت لإنجلترا، أنا مقلتش حاجة غلط، محمد صلاح خارج المنافسة ولا هو يبقى إبراهيم سعيد ولا أنا هبقى محمد صلاح، أنا بتكلم عليه كلاعب كرة أنا مش محتاج ترند، أنا تريند قبل الترند ومش محتاج شهرة واللي شايف نفسه أنه صغير دي بتاعته".
وأكمل “سعيد”: "أنا واثق في نفسي ومحدش يزعل أنتوا عايزين الناس تبقى صغيرة؟ الموقف الأخير بتاع كأس الأمم الإفريقية الأخير ده لما محمد صلاح ساب المنتخب أنا بقول إن دي مش إصابة وهفضل دايمًا أقول كده الماتش مفيهوش أي سبرينت أو أي حركة، هو لما رجع مينفعش يروح يلعب مع فريقه".
واختتم: "أنا بتكلم كلاعب كرة، الإصابة مفيهاش إصابة، تصريحات يورجن كلوب قبل البطولة كان بيتمنى أن منتخب مصر يخرج، كابتن منتخب مصر بيسيب المعسكر ويمشي أقول برافو يعني؟".
