أمير مرتضى: الأهلي مش عدو.. وقلت لطارق حامد خليك زي حسام غالي

أكد أمير مرتضى منصور؛ المشرف على الكرة السابق بنادي الزمالك؛ أن هناك نماذج ناجحة داخل النادي الأهلي تدفعه أحيانا لان يتمنى ان يكون لها مثيل في الزمالك.

وقال منصور في مقابلة مع برنامج "أسرار" المذاع على قناة "النهار": "حاجة من الحاجات اللي بكرهها وبقت موجودة في البرامج والسوشيال ميديا اللي هو فكرة انه عشان ابين أنى زملكاوي اني أطلع اسف على الأهلي أو اشتم في الأهلي أو اقل منه".

وأضاف: "معنديش مشكلة أبقى متخانق مع حد في الأهلي خناقة كبيرة وطويلة لكن ده مبيقللش أن الأهلي نادي جامد والزمالك نادي جامد وفي حاجات ناجحة في الأهلي بتستفزني ببقي عايز أسبقها وأعمل أفكار أحسن وفي ناس في الأهلي كنت واخدهم نماذج لناس في الزمالك وبقولهم عايزين نبقى زي دول".

وتابع: "في حسام غالي مثلا كنت بقول لحازم إمام الصغير وطارق حامد وهما من كباتن الفرقة بقولهم بصوا بيلم الفرقة ازاي وازاي هو قوى واللاعيبة بتحبه؛ عندهم نماذج ناجحة زي عماد متعب ومحمد شوقي وأبو تريكة معنديش مشكلة لو شفت حد منهم أقوله عايز أتصور معاك بحبه عادي".

وواصل: "أنا زملكاوي ومبحبش حاجة في الكرة في مصر غير الزمالك بس دة مش معناه أني شايف الأهلي ده معسكر تاني عدو وناس من جنسية تانية".

وعن أزمة والده المستشار مرتضى منصور مع أحمد حسام ميدو مدرب الفريق السابق قال أمير: "المستشار مرتضى بيتعصب بسرعة جدا وبينسي وهو بيصفي بسرعة عادي ولما شاف ميدو بعد المشاكل اللي كانت بينهم قابله عادي".

وأوضح: "في 2014 مجلس إدارة النادي قرر يمشي ميدو اللي كان مدير فني للفريق والمستشار مرتضى كلف عضو مجلس إدارة أنه يبلغ ميدو بالقرار؛ وباليل المستشار كان ماشي في النادي ولقى ميدو خارج ومعاه حاجته وصعب عليه قاله ايه ياميدو أنت رايح فين قاله خلاص أنتوا طلعتوا قرار أنه مش موجود والمستشار مرتضى قاله مين اللي قالك كده انا مقلتش كده وبعد كده ميدو كمل وخد الكأس".

واختتم: "مشكلة ميدو انه متسرع بردو هو من الناس اللي احترفت برة وممكن يكون إيجابي أكبر من كدة لأن ميدو عنده المعرفة".