المخرج هادي الباجوري: "الجمهور محتاج يتعالج.. بيقطعنا وهو عنده نفس المشاكل"

أكد المخرج هادي الباجوري، أن التقييم الفني للأعمال الفنية لا يجب أن يصدر عن الجمهور العادي، مشيرا إلى أن التقييم يلتفت إليه في حال كان من احد المتخصصين في المجال.

وقال الباجوري في مقابلة مع برنامج "حبر سري" المذاع على قناة "القاهرة والناس": "أنا اللي بيقيمني نفسي؛ أنا لو عامل عمل مش مبسوط منه أنا أكتر واحد بلوم نفسي أنا ممكن اقعد في البيت 3 أشهر اقفل على نفسي مردش على حد عشان عملت عمل مش مبسوط منه".

وأضاف: "أنا بتكلم على التقييم الفني المفروض يبقي من ناس في المجال؛ جوائز الأوسكار بيقدمها النقابيين في المجال زي هناك مهرجان النقابة هو اللي بيقدم الجوايز؛ أنا مش قصدي أن الجمهور ميقيمنيش؛ أنا دلوقي أجي أقيم مهندس وأنا مليش في الهندسة أنا ممكن أقول رأيي بس ودا ميأثرش على وجهة نظره في شغله".

وتابع: "لو في مخرج أو ممثل أو فنان أو ناقد قالي لا أنت هناك مفروض تعمل كذا هنا ممكن اتقبل منه النقد دة واعيد تقييم نفسي ولكن الشكل بتاع رأي الجمهور وأن الناس تبقي مبسوطة من العمل دة كويس ولكن مش يقيموني فنيا".

وعن تصريحه السابق والذي قال فيه "الجمهور محتاج يتعالج"، قال الباجوري: "قلت إن الجمهور محتاج يتعالج؛ ودا كان رد على الهجوم عليا وقلت ساعتها مش هغير نفسي عشان الجمهور وأنه محتاج يتعالج لأني شايف أن الجمهور بيقطعنا ويبهدلنا وهو عنده نفس المشاكل؛ أنا بقول وجهة نظري والناس مبتكرهنيش الحمد لله".

وأكمل: "أنا من حقي أقول اللي أنا عايزه؛ أنا الزبون بتاعي مش الجمهور أنا الزبون بتاعي المنتج والمؤلف؛ أنا افلامي مجابتش إيرادات من اللي بتكسر الدنيا أنا بعمل نوع أفلام معينة ليها سقف في الفلوس؛ أكتر فيلم من النوعية اللي بحبها كان هيبتا وعمل إيرادات محصلتش في تاريخ السينما؛ انا مبخسرش المنتج ولكن مبكسبوش 15 ضعف الفيلم".

واختتم: "انا اتعرض عليا أعمل مسلسل بأجر كبير ومكانش عاجبني ومعملتوش وعمر ما كانت الفلوس هي اللي بتخليني أعمل أو ماعملش".