أمير مرتضى: "أنا مكسبتش من الزمالك.. وصرفت ملايين على النادي"

علق أمير مرتضى منصور، المشرف على الكرة السابق بنادي الزمالك، اتهام عائلته بتحويل النادي إلى "عزبة" خلال فترة رئاسة المستشار مرتضى منصور لمجلس الإدارة.

وقال منصور في مقابلة مع برنامج "اسرار" المذاع على قناة "النهار": "فكرة عزبة لأن في الآخر أن يبقي في عيلة مكونة من 3 أشخاص هما بيشتغلوا في مكان واحد ومسيطرين على النادي دي حاجة حقيقة ومتعبش؛ المكان اللي بنديره أما نسيطر عليه بنسبة 100% أو منبقاش موجودين ودا اتكرر في أندية كتيرة زي الإسماعيلي مثلا كان بيسيطر عليه العثمانيين ودا بيحصل في الأهلي؛ كابتن صالح سليم كان رئيس النادي وكابتن طارق سليم كان مدير للكرة".

وأضاف: "أنا مش شايف أنه يبقي عندنا العقدة بتاعة لو حد نجح في مكان يبعد أسرته؛ يمكن انا واخويا بنحب الزمالك؛ أنا صرفت على الزمالك ملايين وملايين دي أن أنا وصلت لمرحلة أني محوش فلوس وفي لاعب معين عايز أجيبه كان بالنسبالي معنديش أي حاجة في حياتي أني أبقى في المكان ده".

وتابع: "أنا جوه الموضوع وهصرف أي حاجة؛ في نهائي أفريقيا اللي خسرناها قدام النادي الأهلي؛ الرحلة للنهائي فيها 10-12 ماتش وكنت بعمل مكافات من جيبي للاعيبة؛ لاعب معين محتاج أديله تحفيز وعارف أن عنده ظروف خاصة واحنا حاليا معتمدين عليه؛ واللاعيبة هما اخواتي كلهم وممكن أقول الأسماء كنت بقولهم لو كسبنا الماتش هديلك 100 ألف جنيه بعد الماتش لاعيبة كتيرة زي مصطفى محمد وكهربا".

وواصل: "أي مجلس إدارة في أي نادي هو عمل تطوعي؛ أنا كنت متعين مشرف عام على الكرة ودا بيبقي أعلى مرتب ويوصل لملايين في اندية بتدي زي لاعيبة الكرة وانا لما مشيت من الزمالك سنة 2020 اتعرض عليا اشتغل في اندية جوة مصر وبرة مصر في الامارات والسعودية ولكن دي مكانتش شغلانتي أنا كنت بعمل الشغلانة دي للزمالك أنا مكنتش باخد مرتب ولكن صرفت ملايين على الزمالك من فلوسي الخاصة".

واختتم: "كل السفريات وكل المعسكرات اللي على مدار 5 سنين ومعايا فواتير السفريات؛ أنا كنت بصرف على الرحلة بتاعتي والنادي مكانش بيتحمل أي حاجة".