نجل فؤاد المهندس يوضح تفاصيل حريق شقة والده للمرة الثانية

كشف محمد فؤاد المهندس، نجل الفنان الراحل فؤاد المهندس، أسباب الحريق الذي اندلع في شقته الكائنة بحي الزمالك بالقاهرة.

وقال المهندس في مداخلة مع برنامج "صالة التحرير" المذاع على قناة "صدى البلد": "نزلت أصلي الجمعة ومفيش عشر دقائق وقالولي ألحق في حريقة في البيت؛ طبعا الدخان كان مالي المكان ومعرفتش ادخل البيت؛ الحريق كان كبير؛ الحريق مش أول مرة والحريق اللي فات كان سنة 2006 في نفس الشقة".

وأضاف: "الحريق اللي فات كان فؤاد المهندس على قيد الحياة والحريق بتاع النهاردة كان شبيه بيها وأنا مدخلتش الشقة عشان المطافئ والشرطة منعتني وكل حاجة اتحرقت؛ الحريق فكرني باللي حصل مع الأستاذ في 2006".

وتابع: "في 2006 كان سبب الحريق ماس كهربائي والنهاردة بردو ماس كهربائي؛ في 2006 أنا مكنتش موجود وقتها؛ احنا واخدين الدور السابع والتامن ومراتي كانت وموجودة حينها وشافت الدخان وطلعوا وشالوا الأستاذ وجات المطافئ وطفت وقتها وكان كل تركيزهم أنهم ينقذوا الأستاذ وكان غايب عن الوعي وقتها وكان تعبان ودي من الحاجات اللي عجلت بوفاته".

وأكمل: "كل مقتنيات فؤاد المهندس اتحرقت في 2006 وكانت تماثيل الجوايز وشهادات تقدير واللي شوفته النهاردة بالزبط كأني بفتكر موضوع والدي وكان نفس السبب ماس كهربائي؛ الحريق حصل في يوليو وهو مات في سبتمبر؛ هو معلقش على موضوع الحريق وقتها ولكن من جواه كان تعبان".

وأوضح: "أنا مدخلتش الشقة ومش هدخلها دلوقت؛ أنا رافض ولكن قلت لما هرجع الشقة هقعد في أوضة الأستاذ معنديش القدرة النفسية أني أقعد في أوضتي؛ الحادث لسة حاصل النهاردة وجه في تفكيري اني ممكن ابيع الشقة أو اسيبها جايز الاوضة نحس؛ انا بتكلم دلوقت ومش عارف بعد نص ساعة ممكن أعمل ايه".

واختتم: "أنا حاليا قاعد مع أخويا لحد ما أشوف هعمل ايه؛ في حاجات من متعلقات الأستاذ موجودة صور وجوايز ولكن انا مدخلتش الشقة؛ احنا واخدين السابع والتامن وسلم داخلي والشقة واسعة بالنسبالي ولكن اللي مصبرني أن الشقة من ريحة الأستاذ وعشان كدة انا قررت أني لما ارجع الشقة هقعد في أوضة أبويا ومش هفكر أرجع قبل 20 يوم من دلوقت كل الشواهد بتقول أن سبب الحريق ماس كهربائي مش بفعل فاعل".