ياسر جلال يوضح أسباب قبوله بطولة مسلسل جودر

أكد الفنان ياسر جلال، أن مسلسل جودر والذي يعرض خلال شهر رمضان المبارك يعد من الاعمال مكتملة العناصر مشيرا إلى أنه عمل يشرف العاملين عليه أمام المشاهد المصري والعربي.

وقال جلال في مقابلة مع قناة "القاهرة الإخبارية": "أنا بحاول دايما أدور على الاختلاف؛ كل عمل بقدمه يبقى مختلف عن العمل اللي قبله؛ بداية من مسلسل ظل الرئيس غير رحيم غير الفتوة غير الاختيار".

وأضاف: "في جودر عامل شخصيتين شخصية الملك شهريار وشهر زاد بتحكيله حدوته جودر أبن عمر المصري فبيتخيل نفسه الملك شهريار أنه جودر؛ وانا خلصت شخصية شهريار بالشكل اللي الناس متعودة اللي تشوفني بيه بالدقن والشعر الأبيض ولغة الجسد المطلوبة؛ وبعد كده دخلت في جودر وصبغت شهري وغيرت ملامحي عشان تتفق مع واحد بيبتدي ظهوره وهو 30 سنة وعنده مراحل عمريه وبيكبر في السن".

وتابع: "بداية الأحداث عنده 30 سنة وكان لازم أحاول أصغر نفسي في أول حلقتين اللي بيظهر فيهم في الأول وبعدين بيكمل الاحداث وهو كبير؛ مسلسلنا 30 حلقة واللي جاهز في العرض خلال رمضان 15 حلقة".

وواصل: "العمل مكتمل العناصر واحنا مش بنفكر ننافس المستوى العالمي ولكن بنفكر ان كل حاجة تاخد حقها؛ الميزة في المسلسل أن عندنا نص قوي جدا والمتحدة بتنتج العمل من خلال شركتين كبار ومسخرين كل الإمكانيات عشان العمل ده".

وأوضح: "هما انتاجيا مبخلوش عن العمل والجرافكس شركة أروما سخرت 200 موظف شغالين على العمل والاهم أن النص يكون جيد؛ عناصر العمل الفني لازم تكون كلها مكتملة مع بعض؛ وبرة الاعمال دي بيتصرف عليها مليارات؛ احنا الميزانية معقولة ولكن عاملين شيء نتشرف بيه قدام المشاهد المصري والعربي".

وأكمل: "أنا طول عمري بتعب على شغلي؛ أنا بتاع شقى وشغل وأنا همي مش النجومية أو المادة أنا همي شغلي وأني اتقن العمل وأكون راضي عنه ورضايا عن نفسي بعد رضا ربنا هو الفيصل بالنسبالي؛ ممكن اكل الناس تقولي أني كويس وانا حاسس أني مقصر هنا ببقي مدايق والعكس؛ والفيصل هنا هو رضايا عن نفسي".