أحمد موسى: رئيس الوزراء كشف عن فضيحة للمستوردين "مش عايزين يخرجوا البضاعة"
أكد الإعلامي أحمد موسى، أن رئيس الوزراء الدكتور مصطفى مدبولي شدد على ضرورة خفض أسعار السلع خلال الفترة المقبلة بما يتناسب مع تراجع سعر الدولار مقابل الجنيه.
وقال موسى خلال برنامج "على مسؤوليتي" المذاع على قناة "صدى البلد": "الدكتور مصطفى مدبولي رئيس الوزراء النهاردة عمل اجتماع قبل الفطار مع الناس اللي بيسيطروا على الأكل والشرب والسلع والزيت والسكر والعدس والفور والرز كل حاجة؛ قعد مع كبار المنتجين والمصنعين اللي بيستحوذوا على 70-75% من السوق المصري".
وأضاف: "دول مسيطرين على 70-75% من السوق رئيس الوزراء كان غاضبا وقويا جدا والنهاردة العين الحمراء واللي هو خلاص إحنا جبنا أخرنا معاكم؛ كلامه كده بالمناسبة هتسمعوه؛ رئيس الوزراء قال كده ولو أنت قاعد في أي مكان هتقول كلام رئيس الوزراء".
وتابع: "قالهم معقولة سلع تزيد 50-60% في أسبوع طيب هو الدولار في السوق الموازية زاد بالزيادة دي؛ الحاجة تزيد في اليوم مرة واتنين؟ معقولة وجايين النهاردة طيب قولتوا الدولار وفرنا الدولار ايه اللي حصل بعد الدولار".
وواصل: "قالهم كده أنا عايز الحاجة تنزل وتنزل يعني تنزل وقال مش نزول 2-3% أنا عايز تنزل نزول كبير زي ما كنتوا بتزودوا الأسعار وقت الدولار في السوق السوداء وتضربوا أسعار أنا عايز اللي ضربتوه تنزلوه بمنتهي القوة والشدة النهاردة وقالهم من بكرة".
وأوضح: "رئيس الوزراء النهاردة قال ايه كمان؟ كل الجهات المعنية في مجلس الوزراء تنزل من بكره؛ المولات والسلاسل التجارية الحكومة جابت أخرها؛ أنا وفرتلك كل فلوس ودولاراتك يا راجل دانا بوفرلك؛ رئيس الوزراء النهاردة كشف عن فضيحة للمستوردين؛ وفرنالكم الدولار وبعد ما أفرجنا عن كل حاجة تبقى سلع ومنتجات داخل الموانئ بقيمة 1.7 مليار دولار رغم أننا خلصنا ورقها كلها وهما قالوا مش هنفرج عنها للدرجادي بتتاجروا بالناس".
وأكمل: "الحاجة موجودة والدولار متوفر وأنت تخلي الحاجة في الميناء عشان يكسب تاني؛ كسب لما الدولار زاد ولما الدولار قل ولما الدولار مستقر؛ كسب في كل شيء ومش مهم المواطن؛ تحية للدكتور مصطفى مدبولي اللي عمله النهاردة وهو قالهم من بكرة أنا عايز المواطن يحس المواطن مبيحسش أن الأسعار بتنزل".
واختتم: "عملنا فلوس من رأس الحكمة وصندوق النقد والناس قالت بشرة خير واتضح أن مفيش حاجة ليه؟ لأن في من يتحكم في السوق والنهاردة الدولة تدخل والحكومة تدخل ورئيس الوزراء قالهم لازم تنزل الأسعار".
