رسالة من وزير التعليم للطلاب المصريين العائدين من السودان
أكد الإعلامي أحمد موسى، أنه تحدث مع الدكتور رضا حجازي، وزير التربية والتعليم، بشأن أزمة الطلاب المصريين العائدين من السودان الذين لا يجدون مكانا لاستكمال دراستهم بعد أن أجبرتهم الحرب على العودة إلى مصر.
وقال موسى خلال برنامج "على مسؤوليتي" المذاع على قناة "صدى البلد": "اليومين اللي فاتوا جايلي رسائل كثيرة من الطلبة اللي كانوا بيدرسوا في السودان ورجعوا، وفي خطورة لعودتهم إلى السودان فأيه موقفهم".
وتابع: "تحدثت مع الدكتور رضا حجازي وعرضت عليه مشكلة أبنائنا المصريين اللي كانوا بيدرسوا في السودان؛ ورد قائلا: إحنا خدامين للشعب المصري احنا شغالين عشان نحقق طلبات الشعب المصري".
وواصل: "الوزير قال أرجوك قولهم يدخلوا على موقع الوزارة ويبعتوا كل الشكاوى وانا هنظر في كل الطلبات وهنعمل كل حاجة تيسر حال أولادنا واحنا في اماكننا موجودين عشان نساعد المصريين ونساعد أبنائنا".
وأوضح: "طبعا زي ما بقول لحضراتكم بخاطب كل ولادنا المصريين اللي كانوا بيدرسوا في المدارس السودانية الوزير بيقول لو سمحتوا ابعتوا وان شاء الله هيكون في حلول؛ الدولة المصرية والرئيس عبد الفتاح السيسي حريص على أبناء بلده في أي مكان".
وذكر: "النهاردة أبنائنا موجودين هناك ومش هيقدروا يرجعوا نتمنى السلامة للسودان ولكل الدول العربية؛ ولادنا عايزين مستقبلهم العلمي والتعليمي لا يضيع وإن شاء الله مش هيضيع".
ويعاني آلاف من الطلاب المصريين العائدين من السودان من عدم القدرة على استكمال دراستهم في مصر بعد عودتهم من السودان بسبب الحرب.
