ميدو: محمد صلاح أسطورة ولكن لا يصلح قائد للمنتخب

أكد أحمد حسام ميدو، نجم المنتخب الوطني السابق، أن محمد صلاح لاعب ليفربول الإنجليزي يعد أفضل لاعب في تاريخ الكرة المصرية.

وقال ميدو خلال برنامج "السر" المذاع على قناة "النهار": "عمري ما حسدت صلاح لأنه رمز للاعب الكرة الناجح وبنضرب بيه المثل للولاد الصغيرة، أنا مش بضرب مثل بميدو بضرب مثل لمحمد صلاح والنني واللاعيبة اللي اشتغلت على نفسها".

وأضاف: "أنا مهاجمتش محمد صلاح ولكن رأيي أنه مينفعش يكون قائد للمنتخب؛ أنا باخد راتبي عشان أقول رأيي؛ انا بقول محمد صلاح أسطورة ولاعب كبير جدا وبقول إن صلاح أحسن لاعب في تاريخ الكرة المصرية ولكن مينفعش يكون كابتن للمنتخب".

وتابع: "أنا شايف أن موضوع كابتن الفريق ليه عرف في مصر وهو أن الكابتن ده أقدم لاعب في المنتخب؛ ولو أحمد حجازي هو الاقدم يبقي كابتن المنتخب".

وأكمل: "محمد النني شخصية كويسة جدا ولكن حجازي أفضل؛ وصلاح شخصية كويسة جدا ولكن مينفعش يبقي الكابتن وميهمنيش يزعل أو لا من تصريحاتي لأني بقول رأيي ودي شغلتي".

وعن رأيه في رحيل صلاح عن المنتخب خلال بطولة الأمم الافريقية بعد إصابته قال ميدو: "أنا في 2006 في تاني ماتش في البطولة جالي مزق في العضلة الضامة 3 سم وكنت بلعب في توتنهام وفضلت قاعد طول البطولة ولعبت طول البطولة متعور ومكنتش أنا الكابتن ولكن كنت حاسس بالمسؤولية ناحية الناس اللي جات الملعب ومتعشمة فيا خير وأن اساعد البلد دي أنا مبقولش كلام في الهواء وصلاح دي طريقة تفكيره".

وأوضح: "محمد صلاح طريقة تفكيره أوروبي وأحنا حقنا نقول رأينا؛ صلاح شخص وطني وفي مواقف كتيرة كان ممكن ميجيش المنتخب وكان بيجي وبصراحة هو مقصرش مع المنتخب ولكن حال المنتخب مكانش يساعد صلاح؛ احنا مش بنلعب تنس ولازم الفرقة تبقى كويسة عشان صلاح يبقي كويس".

وأكمل: "الارجنتين اخدت كأس العالم؛ ميسى كان أحسن لاعب ولكن كل اللاعيبة كانت بتساعده ومركزة؛ حال الفرقة والاخطاء الإدارية من اتحاد الكرة أدى للي حصل؛ الازمة تم إدارتها بشكل خاطئ وصدرت مشكلة لصلاح".

واختتم: "أنا قلت كان المفروض يمضى على اتفاق؛ انت جاي تقولي عايز أمشي هتمضيلي على الكلام دة لأن أنا من حقي أقعدك وأن اللاعب على قوة المنتخب وفي قانون في الاتحاد الدولي أن اللاعب طالما على قوة المنتخب من حق المنتخب يقوله متمشيش ولو مشيت هوقفك".