مصطفى كامل: "مقبلتش إن حد يسخر من مطربي المهرجانات"

أكد مصطفى كامل نقيب المهن الموسيقية، أنه تحدث مع المطرب على الحجار والمطرب مدحت صالح بشأن الخلاف الذي حدث بينهما بشأن فكرة “100 سنة غناء”.

وقال كامل خلال برنامج "العرافة" المذاع على قناة "النهار": "الأستاذ مدحت صالح والأستاذ علي الحجار الاتنين قامات كبيرة وإخواتي الكبار، ممكن مدحت صاحبي أكتر ولكن أستاذ علي أخويا الكبير وباين في العزا بتاع أستاذ حلمي كنا ماشيين ومع بعض ولكن مدحت صديقي أكتر".

وأضاف: "الاتنين كلموني وكانوا بيعملوا فكرة 100 سنة غناء والأستاذ علي كلمني كان بيشتكيلي وأنا قلتله دا أبداع مقدرش أقول لحد متفكرش؛ وأنا في الكرسي ده ما بشوف غير إلا ربنا اللي خالقني".

وتابع: "القضية دلوقت في إيد صاحب القضية ابنه وأسرته ووقت ما يتم الاحتياج ليا؛ في صاحب أصيل للقضية دلوقت أبنه واسرته ووقت الشهادة هنشهد طبعا".

وواصل: "محدش ياذي حد تحت قيادتي في فترتي ولما أسيب الكرسي دا اعملوا اللي أنتوا عايزينه؛ أنا مقابلتش الشتيمة في مطربي المهرجانات؛ أنا عاديت واحد مفروض كان صاحبي عشان بيتهكم على واحد من الولاد اللي أنا احتويتهم".

وأوضح: "الفلوس اللي دخلت النقابة مش من شعبة الأداء الصوتي؛ الشعبة عليها واجبات وليها حقوق ومحدش يقدر ياخد منهم بريزة فضة برة النقابة وهما ليهم حقوق حصلوا عليها وعليهم واجبات".

وأكمل: "في ناس كتير من موظفين النقابة أنا مشيتهم؛ وفي ناس اتحولت إلى التحقيق والموضوع في ايد الجهات القضائية وراحوا كل الولاد اللي كانوا بيدفعوا شهدوا قدام النيابة العامة".

وذكر: "أعضاء مجلس النقابة مفيش حد مدان منهم وأنا ادنت اللي كانوا يستحقوا الإدانة؛ والنقابة دلوقت حققت إنجازات أنا تسلمت النقابة من أيام سيدة الغناء العربي لغاية 2022 كان فيها 69 مليون جنيه والنقابة دلوقت فيها 190 مليون جنيه أرصدة في البنوك غير المعاشات اللي زادت النص وأنا بقيت اهتم بالمعاشات أكتر من الأعضاء العاملين".

وفاز مصطفى كامل بمقعد نقيب الموسيقيين في يونيو 2023 بالتزكية ليتولى المنصب بعد رحيل الفنان هاني شاكر عن النقابة.

ونحج كامل في تحقيق عدة إنجازات لصالح النقابة أبرزها تقنين أوضاع مطربي المهرجانات وزيادة المعاشات.