مصطفى كامل يهاجم طارق الشناوي: "راجل مش عارف هو عايز إيه"
هاجم مصطفى كامل، نقيب المهن الموسيقية، الناقد الفني طارق الشناوي، مشيرا إلى أن كافة تصريحاته عن الفنانين ليس لها علاقة بالنقد الهادف.
وقال كامل خلال برنامج "العرافة" المذاع على قناة "النهار": "درس إيه اللي هتعلمه من طارق الشناوي؟ أي حاجة بيقولها طارق الشناوي والناس تقول عكسها شرف كبير ليا؛ على المستوى الفني بالامانة أتمنى ميكونش ليا علاقة بيه من كل حاجة بيعملها سواء ليا أو لزمايلي".
وأضاف: "دا راجل أنا مش عارف هو عايز إيه؛ أنا دخلت أصور أربع أيام في الفيلم بتاعي وفي مليون واحد بيشتغلوا وليهم رزق فيه؛ لما أقعد في بيتي وجايب كوباية لمون وأقعد أتكلم".
وتابع: "أنا من ساعة ما دخلت البرنامج في كام بني آدم موجود؟ كام بني أدم ورا اللي احنا فيه دلوقت أنا قابلت رجالة وصحفيين على اعلى مستوي وبلاتوه ومديرين تصوير وكل ده في برنامج واحد ولما أبقى قاعد بهلهل في الناس واشتم واهينهم لا مبحبش الطريقة دي".
وواصل: "الحال اللي بيتكلم بيه على الناس دايما يقول دا فاشل دا ساقط؛ لا انا هدافع عن الناس وياطارق يا شناوي كل ما ألاقيك بتهاجم زميل ليا بشكل لا ينتمنى للنقد الهادف البناء أنا هقف أنا نقيب موسيقيين مصر؛ يعني ايه أيه اكتب مثلا مذيعة فاشلة".
وأوضح: "النقيب ده ممكن أسيب الكرسي دة بكرة؛ دول أصحابي وكرسي النقيب أنا ممكن أسيب الكرسي في أي وقت؛ أنا المقعد ده ملجمني ومانع مصطفى كامل عن أوضاع كتير مايلة المفروض اتدخل فيها بشكل أكبر من كدة".
وذكر: "عيب لما أقول على حد فاشل وكبير في السن؛ دا مش نقد ياجماعة؛ أنا بقول لأي حد خد برأي أي حد إلا طارق".
وكان الناقد الفني طارق الشناوي قد انتقد موقف نقيب المهن الموسيقية، الفنان مصطفى كامل، من إقامة حفل مطرب الراب الأمريكي ترافيس سكوت في الأهرامات.
وكتب طارق الشناوي، عبر حسابه الرسمي بموقع التواصل الاجتماعي "فيسبوك" قائلا: "كما توقعت قبل يومين تراجع كعادته مصطفى كامل نقيب الموسيقيين عن بيانه الأخير ضد ترافيس سكوت، ووافق على إقامة الحفل وسيصدر بيان جديد باسم النقابة للترحيب بإقامة الحفل وبالمطرب العالمي".
وأكمل الشناوي: "لماذا كل تلك الصبيانية وكل هذا الانفلات في إصدار البيانات العنترية شيء من الحكمة والعقل والمنطق يجب أن يتحلى به النقيب. هل يتعلم النقيب من الدرس؟ أقول لكم مع الأسف لم ولن يتعلم".
