هكون أصغر رئيس للنادي.. ميدو يعلن نيته الترشح لانتخابات الزمالك

كشف أحمد حسام "ميدو" نجم الزمالك السابق؛ حقيقة تصريحاته حول الدافع لتسجيله الأهداف حين كان محترفا بالدوري البليجيكي.

وقال ميدو في مقابلة مع برنامج "أسرار" المذاع على قناة "النهار": "أنا قلت الكلام ده كنت بحكي قصة وانا عندي 17 سنة؛ وقلت كنت بجيب أهداف عشان أعرف بنات ودا طبيعي وكنت صغير".

وأضاف: "أنا كنت بحكي قصة بقول وأنا صغير رحت سهرت في مكان وكانوا بيشغلوا الأهداف بتاعة نادي جنت وقلت أنا هجيب أجوال وانزل أسهر باليل؛ وصاحبت ملكة جمال بلجيكا؛ انا سبتها عشان حياتنا كانت مختلفة خالص وهي دلوقت ممثلة مشهورة في بلجيكا".

وتابع: "قصصنا كانت في المجلات هناك وكنا بنطلع في التلفزيون مع بعض وكنت عامل نمرة يعني؛ وهي دائما كانت مشغولة ومش عارف ايه؛ هي كانت مشغولة وبعدين في النص قابلت يسرا والله العظيم يسرا أحلي أنا بشوف أن مراتي قمر؛ متجوزين بقالنا 22 سنة".

وعن إمكانية ترشحه لانتخابات مجلس إدارة نادي الزمالك قال ميدو: "في وقت من الأوقات همسك نادي الزمالك وأنا حاليا مشغول بالمشروع بتاعي أول ما يقف على رجليه هدخل نادي الزمالك؛ اللي يمسك نادي الزمالك لازم يبقي مستعد للحرب؛ اللي يرأس الزمالك لازم يكون راجل شجاع لا يخاف من أحد".

وواصل: "لو مسكت رئيس الزمالك هحارب على حقوق النادي حتى لو هتسجن؛ أنا واخد على الحروب؛ المنافسة الشريفة وطبيعي ان ناس تدخل مطلوبة وأنا دلوقتي مش بخطط لكده ولكن في وقت من الأوقات ممكن اخطط لكده؛ أنا أصغر لاعب مثل الزمالك عبر التاريخ وأصغر مدرب درب الزمالك عبر التاريخ وإن شاء الله هكون أصغر رئيس لنادي الزمالك عبر التاريخ".

وذكر: "حازم إمام حاجة وانا حاجة تانية خالص؛ عمري ما هنزل في انتخابات الزمالك قدام حازم إمام لو حازم نزل رئيس للنادي هنزل نائب معاه؛ دا راجل أكبر مني زالكابتن بتاعي إيه المشكلة".

واختتم: "معنديش مشكلة مع المستشار مرتضى منصور رئيس نادي الزمالك السابق واتخانقنا قبل كدة ولكن معنديش أي مشكلة معاه وأولاده اصحابي وبحبهم جدا".