بوسي ترد على الاتهامات بالتسبب في وفاة زوجها

ردت المطربة بوسي، على الاتهامات الموجهة إليها بالتسبب في وفاة زوجها الراحل، موضحة أن كل ما يقال عن هذا الأمر غير صحيح.

وقالت بوسي خلال برنامج "العرافة" المذاع على قناة "النهار": "أنا متعودة أني باتجه للصمت ومش أي حد معدي في الشارع بيقول خبر المفروض أني ارد؛ اللي عنده حاجة يقولها".

وأضافت: "ابني وقت الخلافات دي كان صغير وأنا مبتكلمش عشان عاملة حساب لمشاعر، ابني لأنه في الأخر دا أبوه وهو عنده 16 سنة دلوقت وأيا كان ابوه وحش أو حلو دا لنفسه ومقدرش أجيب سيرة باباه بحاجة وحشة".

وتابعت: "أنا هوضح صورة الناس اللي بتطلع تقولك دا كان المنتج وهو اللي جابها وعملها، واخته تقول اللي هي عايزاه زي ما اتهمتني أني السبب في موته وقهرته؛ قهرته بإيه إذا كان هو ميت في السجن أصلا".

وواصلت: "أنا مش جايه لنصر محروس ولا لمحسن جابر؛ أنا جاية اتعرفت عليه أنه بيشغل نمر في شارع الهرم وهو مش منتج ولا حاجة؛ أنا كنت بشتغل في الزقازيق وناس نصحتني أني أنزل مصر وقالولي نعرف واحد ممكن يمسك لك شغلك".

وأوضحت: "أنا رايحة لواحد هيمسك لي شغلي في شارع الهرم وهو قالي إنه مطلق أم بنته وكانت بتشتغل راقصة وبطلت وربنا تاب عليها وهي ست محترمة في بيتها وبتربي بنتها بطريقة محترمة؛ اشتغلنا وعشان هو الواحد يذكر محاسن موتاه عشان هو بني آدم طماع وقالوله البنت دي هتبقي نجمة في يوم ما لف عليا واتجوزني بطريقة ما وعرف يلف عليا واتجوزني".

وأكملت: "أنا كنت عيلة صغيرة وعندي 19 سنة وعرف يوقعني ويضحك على عقلي عشان يتجوزني وياخد كل جنيه باخده؛ كان أكتر سبب أني أتجوز إني أهرب من سيطرة خالي واستغلاله ليا وكان واخد كل شقايا وعشان أهرب دخلت في الأسوأ منه".

واختتمت: "هو معملنيش؛ هو كان مدير أعمالي وماسكلي شغلي ومش هو اللي وصلني إحنا كنا بنشتغل مع بعض وكل علاقاته كانت في شارع الهرم وبيتعامل معايا زي أي نمرة ولكن عرف يوقعني ويتجوزني وهو بيتجوز النمرة اللي بيمسكها".