أمير كرارة: في ناس بتدفع فلوس عشان يقولوا المسلسل وحش
أكد الفنان امير كرارة؛ أن هناك بعض النجوم يحققون نجاحات في السينما ولا يحققون نفس النجاح في الدراما مشيرا إلى أن ذلك ربما يعود إلى سوء الاختيار.
وقال كرارة خلال برنامج "حبر سري" المذاع على قناة "القاهرة والناس": "هي معادلة غريبة محدش عارف في ممثلين بيعملوا مسلسلات جامدة جدا ولكن في السينما مفيش؛ وفي العكس كمان؛ في نجم سينما وفي نجم تلفزيوني أو ممكن يكون اختياره غلط؛ يكون بيختار في التلفزيون صح ولكن السينما حاجة والتلفزيون حاجة".
وأضاف: "يمكن يكون الموضوع سوء اختيار مش أكتر؛ في دور كمان للجان الالكترونية ولكن المسلسل الحلو حلو والناس بتشوفه ولكن مينفعش يبقي مسلسل وحش أوي يعني والناس دافعة فلوس سوشيال ميديا عشان الناس تكلم عنه".
وتابع: "في ناس مبتتفرجش ولكن ممكن تشوف مواقع كاتبه المسلسل حلو وخطير؛ في ناس بتستسهل وهما أصلا مشفهوش والله؛ المسلسل الحلو محدش بيختلف عليه ولكن لو مسلسل وحش وفي لجان بتزق فيه عشان يطلع مهما عملوا مش بيحصل كدة ولكن على العكس بيندفع فلوس عشان يقولك المسلسل وحش وهو معملش جديد ولكن بيبان".
وواصل: "في كذا صفحة مسكاني بقالها فترة وكل أسبوع بينزلوا حاجة؛ موضوع السوشيال ميديا بالنسبالي مختلف عن الناس كلها؛ هو مهم جدا ولكن الأهم منه الشارع؛ لما باجي أشوف ناس ولو لقيت ناس شاتمة أمير اشتمنى براحتك أنا مش فارقة ولكن فرحتي ونجاحي لما بنزل الشارع بشوف الناس بتكلم ازاي".
وأوضح: "انا مبركزش مع اللجان؛ زمان كنت بدايق ولكن دلوقت خلاص؛ مظنش حد من جوة الشغلانة بيعمل كدة؛ أنا بشوف الناس كلها حلوة والمهنة كلها ناس زي الفل وناس بتحب بعض؛ وممكن يكون حد أنا أعرفه وبيعمل كده ولكن دا غريب".
ويخوض الفنان أمير كرارة السباق الرمضاني بمسلسل "بيت الرفاعي" ويشارك في بطولته كلا من أحمد رزق، رياض الخولي، سيد رجب، أحمد فؤاد سليم، رحاب الجمل، ميرنا جميل، محمد لطفي، إيناس مكي
وتدور أحداث مسلسل بيت الرفاعي في إطار تشويقي، إذ يتناول عدة صراعات بين أبطاله، وهم أشقاء يحاولون السيطرة على كرسي كبير العائلة بعد وفاته، لتبدأ المشكلات فيما بينهم والنزاع على الميراث، في تصاعد تشويقي للأحداث.
