أحمد موسى: "عبد الله السعيد تسبب إن إمام عاشور يكسب 50 ألف دولار"
أكد الإعلامي أحمد موسى؛ أن جماهير الأهلي كانت على يقين من فوز الفريق الأحمر على الزمالك في نهائي كأس مصر.
وقال موسى خلال برنامج على مسؤوليتي" المذاع على قناة "صدى البلد": "مش عارف ليه جمهور الأهلي كان عنده إحساس وثقة قبل مباراة أمبارح أن الأهلي هيفوز؛ كنت عامل حلقة يوم الأربع وكنت بتكلم عن تلاتة واحد ولكن محدش سمعته قال أن الأهلي هيخسر الماتش؛ لا جمهور الأهلي كان عنده هذه الثقة أنه فايز فايز".
وأضاف: "لدرجة أن الزمالك كان ماسك كورة وبيهاجم وكان عندنا ثقة إن ربنا هيكرمنا؛ تخيلوا عبد الله السعيد لو كان خد خطوة ربع سنتي كان إمام عاشور أوفسايد؛ اللي غطى تسلل إمام عاشور عبد الله السعيد كان مغطي بيمكن نص متر".
وتابع: "بعض السادة المحللين قالك نرسم خط؛ مانا رسمت خط عبد الله السعيد مع عواد ورا ولكن المهم ايه؟ الفار أصل الفار دة صورته محدش يقدر يلعب فيها؛ عبد الله مغطي إمام عاشور زي ما قال الكتاب ولو أن عايز تشوف إن عبد الله مش مغطي وإمام عاشور تسلل هتشوفها كده".
وواصل: "عبد الله السعيد تسبب إن إمام امبارح ياخد 50 ألف دولار؛ وإمام عاشور لاعب جامد وقوي جدا نمسك الخشب وطبعا كانت هذه الثقة الزمالك مسيطر ولعب مباراة محترمة جدا ومشكلة الزمالك كانت قدام أنه يخلص معندوش المهاجم اللي يخلص".
وأوضح: "الجزيري جاتله كورة لو مش شايف كان يحطها جول؛ يقفل عنيه كدة ويسجل جول؛ عندك مشكلة في الجزيري أنا اتحملها ايه؟ الجول فاضي ومصطفى شوبير كان هايل وعندك لاعب من الأهلي واقع ومفيش تسلل وكورة الجزيري لو جات كان الزمالك بقى بطل الكأس".
وذكر: "شكرا لاشقائنا في المملكة العربية السعودية التنظيم ولا أروع؛ أداء واحترافية واستقبال وتنظيم وكل شيء؛ بحيي المستشار تركي أل الشيخ على المباراة وطاقم التحكيم؛ حكم برازيلي أمبارح معندوش غلطة؛ غلطة وحيدة لينا كانت ضربة جزاء بس مش مهم".
واختتم: "أنا حاسس أمبارح بعمرو أديب؛ كان قاعد ورا المستشار تركي ال الشيخ وكان لابس تشيرت نادي الزمالك؛ ودي كانت مشكلتنا مع بعض في برنامج القاهرة اليوم وكنا مع بعض في لندن يوم ماتش 4-3 ولكن عمرو أمبارح كان في حالة صعبة جدا؛ عمرو بحييك وبمسي عليك وبقولك معلش ياعمرو كان أمبارح في حالة صعبة جدا".
