عمرو أديب للحكومة: بلاش مشاريع لإثبات القدرة وخلوا بالكم من رغيف العيش
حذر الإعلامي عمرو أديب، من عودة أزمة الدولار إلى الواجهة مجددا بعد أن خفتت عقب توقيع صفقة مشروع رأس الحكمة بقيمة 35 مليار دولار.
وقال أديب خلال برنامج "الحكاية" المذاع على قناة "أم بي سي مصر": "إذا لم تكن سريعا وحكيما وجريئا وحازما في الفترة اللي جاية دي هنرجع تاني نشوف أبو 60 وأبو 70 هما القرشين دول وبعد كده لو ملحقتش خلاص".
وأضاف: "في موجة وفي تفاؤل واللي عملته الإمارات ده خلي الناس في تفاؤل وأكد الناس بتوع الإمارات دي مش هيدخلوا في مشروع خسران؛ أرجوكم كونوا مرحبين وسعداء ومتفائلين لو سمحتم أنا لا احتاج أن الدولة المصرية تثبتلي قد ايه واقفة على رجليها".
وتابع: "بلاش مشاريع دلوقتي لاثبات القدرة دي انكمش؛ وأهدى شوية وظبط حياتك وخد بالك من رغيف العيش والتموين والعلاج والتعليم في حاجات محتاجة نفس وبعدين ابقى ارجع لكل شيء عملاق والناس الان تنظر لترقب".
وواصل: "فين؟ هتجيبولنا ايه مانتوا معاكم فلوس؛ أنا مش عايز افتح بوقي وأقول التزاماتك ايه؛ أنا عايز أقولك خد بالك من اللي بيجرا دلوقت أنت في نقطة حلوة خدها وأطلع؛ أنا راجل عندي برنامج واعلانات وناس بتشتغل معايا ومن مصلحتي تكون الحياة احسن ولذلك أنا رأيي أن الدور الأول والتاني والتالت للبلد في الفترة المقبلة أن تنخفض الأسعار".
وأوضح: "لغاية النهاردة الناس بتكلم نفسها من الأسعار؛ أنا بصراحة لم أعد اهتم اوي بالدولار يطلع أو ينزل فليكن الرب معه أنا كل اللي يهمني أن أرى التأثير وأن دة يؤثر على الناس؛ الناس عندها حالة ترقب مشوب بالحذر وفي ناس متنكدة جدا وكانت عايزة الدنيا تفضل متكعبلة".
وأكمل: "أنا بقول نستغل الفرصة ورحبوا بالاستثمار؛ الفلوس برة صعبة والفوايد على الإقراض صعبة والناس اللي جاية تتعامل معاك دي أساتذة هندسة مالية واللي بيجبلك قرش النهاردة جايبة وفاهم بيعمل أيه ومش مستعد أنه يخسر فيه".
واختتم: "انسوا فكرة أن الناس معاها فلوس ومش فارق معاها أحنا بنتعامل مع ناس تانية خالص عندهم مستشارين وعندهم حسابات ودراسات جدوى".
