الحديد تراجع 14 ألفا.. نشأت الديهي: الأسعار بدأت تنخفض بوتيرة متباينة
أكد الإعلامي نشأت الديهي؛ أن هناك اتجاه عام في السوق المصري نحو خفض أسعار السلع المختلفة، مشيرا إلى أن هناك كثير من السلع التي شهدت أسعارها تراجع ملحوظ.
وقال الديهي خلال برنامج "بالورقة والقلم" المذاع على قناة "تن": "النهاردة في قرار من وزير التموين بكتابة الحد الأقصى لسعر 7 سلع استراتيجية وهي الأرز والسكر والمكرونة والزيوت والفول والالبان والاجبان؛ لما تشتري حاجة من دول هتلاقي سعر السلعة عليها وأعتقد دي بداية لأخبار كويسة".
وأضاف: "السبع سلع دي هتبقي أكتر وفي مقترح لتثبيت أسعارها لفترة معينة؛ ولكن دي بوادر وإشارات أن السوق بدأ ينضبط قد لا يكون بالسرعة الكافية والحكم المطلوب ولكنه حاصل؛ الأسعار بدأت تنخفض بوتيرة متباينة والحديد تراجع 14 ألف جنيه وزي ما فهمت من خبراء قالوا إن سعر طن الحديد لا يجب أن يزيد عن 40 ألف جنيه".
وتابع: "النهاردة كمان تراجع في أسعار الأسمنت وبقي سعر الطن للمستهلك من 2150 إلى 2200 وأيضا في أسمنت تاني تراجع إلى 1960 جنيه؛ أسعار الأسمنت انخفضت بعد أسعار الحديد وهذا سينعكس على الأسعار لما الفقاعة راحت والمغالاة تراجعت خلاص".
وواصل: "الدهب كمان انخفض؛ الدولار تراجع إلى 43 جنيه والدهب انخفض أيضا بعدما انخفضت أسعار العملات الأجنبية وأيضا الحديد والاسمنت وأسعار السلع الأساسية زي الدواجن والبيض واللحوم".
وأوضح: "الانخفاض ليس نتيجة أن الموانئ فتحت أبوابها والبضاعة طلعت ولكن لان التجار اللي كانوا بيخزنوا السلعة خافوا أن الأسعار تنخفض فطلعوها وبقي المعروض كتير فانخفضت الأسعار؛ الدولار نفسه الناس اللي مخزنين بدأوا يطلعوها؛ في ناس اشتروا دولار بستين جنيه على أساس أنه مستودع للقيمة وأنه هيغلي ولكن لما الدولار نزل خسروا قد ايه؟".
وذكر: "بلاش اللعب في المستنقع لأن دي تجارة الكسبان فيها خسران دنيا واخره يعني؛ التجار اللي تلاعبوا بأقوات الناس بالتأكيد مش هيكسبوا؛ والنهاردة كما في بيان بيقول إن عبوة الزيت تراجعت وسعر السكر استقر عند 27 جنيه وكيلو المكرونة تراجع جنيه وكمان الشاي واللحوم".
واختتم: "الكلام ده كله لما أقوله في ناس بتروح تلاقي السعر نزل يقولوا دا صحيح وفي ناس بتروح بتلاقي الأسعار لسه وده مفهوم ولكن يوم واتنين الأسعار هتنخفض؛ أنا بقول إنه خلال ساعات هتلاقي الأمور منتظمة".
