أحمد موسى للفلسطينيين في غزة: "لو جالك مساعدات أمريكية ارميها في البحر"
هاجم الإعلامي أحمد موسى؛ الولايات المتحدة الامريكية على خلفية دعمها الاحتلال الإسرائيلي عسكريا ودبلوماسيا ثم إعلانها إنزال مساعدات للفلسطينيين في قطاع غزة.
وقال موسى خلال برنامج "على مسؤوليتي" المذاع على قناة "صدى البلد": "لا أحد يحاسب جيش محتل مغتصب الأرض ويقتل في الشعب الفلسطيني ولا حساب لحد أمبارح؛ الجزائر قدمت في مجلس الامن عشان يطلعوا قرار ادانة؛ أمريكا شريك في هذه الجرائم؛ السلاح الأمريكي وبتدي حماية ليهم".
وأضاف: "جيش الاحتلال بيقتل وعارف في حماية في مجلس الامن زي ما حصل امبارح؛ هو الفيتو الأمريكي يوفرله الحماية واقتل في الشعب؛ تقدر تطلع بيان ادانة؟ لا المجتمع الدولي عايز بيان ادانة وامريكا قالت لا دا مش عايز إدانة وتيجي تقولي أمريكا".
وتابع: "أمريكا هي اللي موفرة الحماية والسلاح وهي الداعمة سياسيا وعسكريا ودبلوماسيا وهي شريكة في هذا الاجرام وسيبك من أي كلام وأي مساعدات يقدموها الامريكان وانت بتقتل في الشعب ورافض وقف إطلاق النار؛ انا لو من الفلسطينيين هرمي المساعدات دي في البحر".
وواصل: "أنا بقولهم على الهواء لو جالك مساعدات أمريكية ارميها في البحر متخدهاش دا هو اللي بيقتلك؛ وقول كدة مساعدات أمريكا مش عايزينها؛ أنت بتدي سلاح من هنا وترميله لقمة عيش من هنا".
وأوضح: "اللي بتعمله أمريكا فوق تصور أي بشر؛ لا وقف إطلاق نار عايزين ولا ادانة لجيش الاحتلال عايزين؛ أنا اصدق أمريكا على اللي بتعمله؟ مش هاين عليكم تدينوا؟ هو ده لا يستحق ادانة؟ بتقولوا اللي بيحصل ده غلط طيب قولولهم دا عيب ناس عزل رايحين يخدوا دقيق دول بشر".
وذكر: "المواطن الفلسطيني ليس له حقوق يعني؟ تاني بقول أمريكا ولا شيء مهما تتكلم وتقول لا تصدقوا أمريكا وكل المشاهد دي عار على أمريكا قبل ما تكون عار على إسرائيل؛ إسرائيل تعلم جيدا أمريكا لن تسمح بتمرير أي بيان إدانة أو أي قرار ضدها".
ونفذت الولايات المتحدة الأمريكية أول عملية إنزال جوي للمساعدات على قطاع غزة، حيث تم إسقاط أكثر من 35 ألف وجبة بالمظلات بواسطة ثلاث طائرات عسكرية.
