أحمد موسى عن شائعات بيع المطارات: "مصر لا تبيع أي شيء"

علق الإعلامي أحمد موسى على الشائعات المتداولة على وسائل التواصل الاجتماعي والتي اشارت إلى نية الدولة بيع المطارات.

وقال موسى خلال برنامج "على مسؤوليتي" المذاع على قناة "صدى البلد": "النهاردة كان في مؤتمر دولي خاص بالمطارات الافريقية وانعقد في مقر القوات الجوية وحضره 52 دولة افريقية و400 ممثل من دول أفريقية وافتتحه الوزير محمد عباس حلمي".

وأضاف: "على هامش المؤتمر أتكلم الوزير عن المطارات المصرية وقال تصريح؛ وانتوا عارفين طبقا في إطار الحملات ضد البلد؛ قالك بعد رأس الحكمة هيبيعوا المطارات؛ مفيش حاجة اسمها تبيع مطار هو مطار اتاتورك باعوه ولا مطار هيثرو باعوه ولا مطارات فرنسا باعوها؟ اسمه إدارة وتشغيل؛ طول الوقت الناس تشتكي من المطارات والخدمة في المطارات".

وتابع: "الدولة عايزة تعمل اللي حضرتك عايزه في إدارة المطارات المصرية؛ هل الموضوع دة جديد وأول مرة نسمع عنه؟ والا كان في كلام قبل كده؟ رئيس الوزراء أتكلم عن الموضوع في 5 نوفمبر 2023؛ الموضوع مش النهاردة ولكن في إطار رأس الحكمة اللي عاملة ضربة لاهل الشر الحق بقي تاني".

وأكمل: "مصر لا تبيع أي شيء؛ رئيس الوزراء أتكلم عن الموضوع دة في 5 نوفمبر 2023 واتكلم تاني في يناير اللي فات وقال الاستعانة بشركات القطاع الخاص في تشغيل المطارات ضروري؛ هي الشركات دي مش أفضل وعندها كفاءات؟ عايزين القطاع الخاص ولا مش عايزين؛ الدولة تعمل ايه؟ ماهو ده في إطار تمكين القطاع الخاص ووثيقة مليكة الدولة والإدارة والتشغيل".

وأوضح: "اللي بنلاقيه برة هنلاقيه في مصر؛ احنا كنا بنقول الحق والمطارات والناس عمالة تهري؛ الدولة تعمل ده مش عاجب ومتعملش مش عاجب ايه الموضوع؟ الاستهداف للبلد؛ وأنت عندك خطة هتعملها؛ وزير الطيران قال مزايدة عالمية عالمية لادارة وتشغيل المطارات المصرية".

واختتم: "هل ده سر حربي هل دا عيب البلد تعمله؟ هل النهاردة المطارات شايفها زي الفل؟ السنة اللي فاتت مطار القاهرة استقبل 26 مليون عايز مطار القاهرة يستقبل 30 و35 و40 مليون؛ القطاع الخاص بيعمل إدارة وتشغيل ومش معني بأي شيء اخر؛ مفيش دولة معنية بإدارة المطارات".