عمرو أديب يوجه رسالة مهمة للحكومة بشأن أسعار السلع في الأسواق
طالب الإعلامي عمرو أديب، الحكومة باستغلال الانتعاش الذي حدث عقب صفقة رأس الحكمة وضخ المزيد من السلع في السوق من أجل خفض الأسعار.
وقال أديب خلال برنامج "الحكاية" المذاع على قناة "أم بي سي مصر": "الدولة راحت مطلعة مليار ونص وقالت روحوا طلعوا بضائع من الجمارك؛ الدولار سعره اتغير كتير والاحتمال أنه يتجه للهبوط وفي سلع ابتدينا نسمع أنها اتلحلحت؛ كلام عن الفراخ والبيض واللحمة أنها بتفكر تنزل من ارتفاعاتها".
وأضاف: "حالة من حالات التفاؤل موجودة عند الناس؛ حديد نزل والدهب نزل؛ أنت لو مكنتش عملت الصفقة دي كان وضعك هيبقي ايه النهاردة؛ كنا بنتكلم أن في ازمة خانقة والحمد لله أن في حد عرف يوصل للتوليفة دي أنا رأيي اللي قال عليه رئيس الوزراء دا شيء عظيم وعملت للبلد نفس وراحة واطمئنان".
وتابع: "الناس كان جالها وقت معندهاش اطمئنان ولا ثقة؛ البلد امبارح غير النهاردة؛ الأشياء اتغيرت وفيها نفس؛ ايه اللي بيحصل؟ في ظاهرة مهم أوي تتفرجوا عليها؛ امبارح والنهاردة وعشر أيام كمان؛ السوق بيجربك اخبارك ايه بقي انت جامد قد ايه؟ انت بتتحرك ازاي؟ انت بتوزع الفلوس ازاي؟ لو قلنا جايلك كاش 10 في مليار ونص اتصرفوا اهو هتوزع الفلوس ازاي؟".
وواصل: "الراجل بتاع الفرخة ده بيجربك؛ في الغالب الدرة والصويا بتنزل ولكن هل هتسمع عنده وإلا لا؟ نفس الشيء في الدولار هو نزل وهل في بيع وشرا بالسعر الجديد؟ أنا كل دة مبفهموش غير بالاستدامة؛ لما توصل لسعر وعارف تسيطر عليه لمدة طويلة".
وأوضح: "انا عايز حضراتكم من النهاردة؛ أي حد يكلمك قوله ايه أنت مش شايف الدولار نزل ولا ايه؟ احنا عايزين الحاجة حلوة وجميلة ورخيصة؛ الحاجة مش طالعة على طول ولا نازلة على طول؛ السوق النهاردة بيجربك أنت جد أنت هتنزل فلوس؟ هتقدر تميل على بنك تاخد قرشين تكمل بيهم يومين تلاتة بس الحق السوق وهو سخن لو انضرب دلوقت هيكمل ضرب؛ انزلوا اضربوا السوق يا جماعة".
واختتم: "اللي بيحصل على سبيل المثال؛ أنا عندي شوية علف؛ زيي زي الراجل اللي معاه دولار أو دهب أنا خايف أبتدي أبيع أقل وتو ما عرضت زيادة هيبتدي ينزل وهو لو شم أنك مصرفتش ومدبرتش هيمسك في السعر؛ انزل هات سعر قليل عشان بعد كده هنثبت".
