مصطفى بكري يستعرض تقرير دولي: ثروة مصر تضاعفت إلى 2500 مليار

استعرض الإعلامي مصطفى بكري تقريرا لبنك كريدي سويس؛ أشاد بالتجربة الاقتصادية المصرية وأكد أن ثروة البلد تضاعفت عدة مرات.

وقال بكري خلال برنامج "حقائق وأسرار" المذاع على قناة "صدى البلد": "التقرير أشار إلى أننا في العشر سنين دي احنا زيدنا 3 أضعاف وقال إن دة طال أشياء كثيرة والعاصمة الإدارية والموانيء وتحلية المياه والطرق؛ وتحتل مصر المركز الـ 32 في قائمة أغنى الدول من حيث الثروة القومية والأصول وكنا في 2014 رقم 41".

وأضاف: "التقرير أشاد بالتجربة المصرية وقال إن معظم دول الإقليم انخفض ترتيبهم عكس مصر اللي واصلت بفضل المشاريع القومية؛ دا كلام بنك كريدي سويس المعني بالثروة العالمية وتطورها؛ مصر لما استلمها الرئيس عبد الفتاح السيسي قيمة الثروة المصرية كانت 500 مليار دولار والنهاردة بقت 2500 مليار دولار".

وتابع: "لما بيطلع البعض وترصد التقارير الدولية ان مصر بقت تاني اقتصاد في افريقيا وتاني اقتصاد في المنطقة العربية؛ احنا عندنا ازمة دولار وارتفاع التضخم نتيجة ظروف كتيرة ولكن الدولة بتحل وتبذل كل الجهد؛ صحيح أن الخطاب المحبط كبير".

وواصل: "السيد الرئيس أتكلم عن معاناة الناس وهي معاناة صحيحة ووجه التحية لصلابة وصمود الشعب المصري؛ احنا شعب بيبص لامنه القومي قبل أي حاجة في الدنيا؛ الرئيس مدرك أن لقمة عيش الناس مهمة وأن أستر البطون والبيوت مهمة؛ والراجل اللي وقف مع الشعب في لحظات كتيرة جدا ومعارك كتيرة جدا واللي رد الاعتبار للمرأة وذوي الهمم والفئات المهمشة".

وأكمل: "الرئيس تحدى العالم ورفض الصفقة وعايز مصدر حكومي يكذبني؛ عرض على الرئيس السيسي 250 مليار دولار ليسمح بتهجير الفلسطينيين إلى سيناء والرئيس قال أبدا كل شبر في مصر مغموس بدم الشهداء".

وذكر: "احنا هنا قدام قائد وطني عنده إحساس بالبلد وحاسس بالوضع الاجتماعي والاقتصادي؛ عندنا أخطاء بس بنصححها؛ وأي حد بيتكلم من برة احنا أنا لا اصدقه؛ لا الأخ اللي بيتكلم من أمريكا ولا اللي قاعدين في لندن؛ قولوا زي ما انتوا عايزين احنا لا نعيركم اهتماما؛ اوعوا تفتكروا انكم عايزين الشعب أو بتبكوا على الشعب".

واختتم: "أنا مشفتش حد بيكره الجيش والشرطة والقضاء ولا تراب الوطن غيركم؛ أين الانتماء؟ داحنا لما فريق الكرة بيتهزم بتبقوا فرحانين فيه؛ الشعب المصري محدش يقدر يضحك عليه دا شعب واعي وفاهم كويس ايه اللي بيحصل".