عمرو أديب: "لو جبنا وزير تموين من سويسرا هيعمل إيه؟"
عبر الإعلامي عمرو أديب عن دهشته من الهجوم المستمر على وزير التموين بسبب عدم توافر بعض السلع مشيرا إلى أن الوزير ليس له علاقة بما يحدث.
وقال أديب خلال برنامج "الحكاية" المذاع على قناة "أم بي سي مصر": "الناس اللي بتهاجم السيد وزير التموين؛ هو ماله؟ الناس اللي هاجموا الوزير وهو بيفتح أهلا رمضان هو ماله؛ الراجل حاجة بسيطة أنت عايز السكر بعشرة جنيه اتفضل أهو عايز الزيت بأربعة جنيه أهو؛ وزير التموين ماله؟ اديله فلوس".
وأضاف: "بطلوا حكاية وزارة التموين تضبط الأسعار؛ مفيش ضبط للأسعار؛ وفر السلع سعرها ينزل قلل السلع سعرها يزيد؛ هل لو بكرة جبنا وزير تموين تاني من سويسرا؛ هيعمل ايه؟ هو عنده موارد وتركة مهمة جدا اسمها التموين بقي اللي هي الناس اللي بتروح كل شهر وفي رقبته مليارات الارغفة أسبوعيا أبو شلن".
وتابع: "الناس اللي متخانقة دي بيقلك أنا خدت ازازة زيت واحدة قد كده؛ مهو معندوش؛ هو معندوش الاحتياطي اللي يسد الازمة مين اللي يسد الازمة؟ وزير المالية".
وتابع: "من يومين السيد رئيس الوزراء قعد مع وزير المالية عشان يشوفوا حل للألبان والزيوت؛ معني رئيس الوزراء أنه يعمل اجتماع عشان يشوف اللبن أنه مفيش؛ هيجي وزير المالية يقولك عايز فلوس عشان استورد ويروح لمحافظ البنك المركزي يقوله أنا عايز دولارات فمحافظ البنك المركزي يقوله أنا عندي أولويات مش هقدر أصرف كل الدولارات".
وواصل: "هو ليه السيد محافظ البنك المركزي معندوش كل الدولارات؟ لأن في أزمات وفي قناة السويس اترزعت النص والسياحة مش هتعمل التارجت بتاعها السنادي والمصريين بالخارج قللوا تلت التحويلات لمصر والأموال الساخنة خرجت من مصر من أكتر من عام والصندوق معملش الاتفاق وأنت مبعتش الأصول".
وأكمل: "أنا بستغرب من الحالة اللي بتيجي للناس والهجوم على وزير التموين؛ هناك أزمة اقتصادية والأشياء لن تكون متوفرة هو مش عايز يقولك عشان ميدايقكش؛ ايه اللي مش مفهوم في أنه عندي ازمة اقتصادية؟ أنت النهاردة في بيتك قادر توفر كل الحاجات؛ عارف تشتري لحمة زي ما كنت بتشتري قبل كدة؟ ايه اللي مش فاهمينه في الموضوع".
واختتم: "قعدوا مع التجار وقالولهم ياجماعة قدر الإمكان نحاول نعمل كذا وكذا؛ ايه اللي هيحصل حاجة من اتنين أما الأمور تفضل صعبة شوية علينا أو عملت حاجات تجيب دولار أو أن الازمة ستستمر صعبة".
