عمرو أديب يطالب بإعلان مواعيد تخفيف الأحمال في رمضان: "قولولنا من بدري"

طالب الإعلامي عمرو أديب؛ الحكومة بإعلان مواعيد تخفيف أحمال الكهرباء خلال شهر رمضان المبارك قبل بداية الشهر بوقت كافي.

وقال أديب خلال برنامج "الحكاية" المذاع على قناة "إم بي سي مصر": "الغالب أنه هيتقطع في وقت ما ما بين 11 إلى 5 ولكن مفيش حاجة واضحة ولو سمحتوا قولولنا ناويين تعملوا إيه من بدري".

وأضاف: "في ناس تقولك لو سمحت متقربش من الساعة 3 إلى 5؛ الناس راجعة من الشغل واللي بيتوضى واللي بيطبخ؛ هناك آراء وكلام وفي ناس اقترحت متقطعوش كل يوم في نفس المعاد؛ ناس يوم خدها من 11-12 وخد حد تاني في منطقة أخري يعني أعمل روتيشين".

وتابع: "الناس بتقول إيه لو سمحتوا في رمضان نعمل روتيشن بحيث الوقت الميت كل يوم حد الوقت ميت بالنسباله غير حد تاني؛ في ناس بتقولك لا اقطعلي النور في معاد أنا عارفه كل يوم".

وواصل: "الناس مش ناقصة النور كمان في الأسعار بتاعة رمضان ومأساة السكر؛ لو سمحتم لما تكلمني انا كمواطن برتاح بحس أنك عامل تخطيط معين أو حاجة معينة وبعدين لما تقول الحاجة تاخد رجع الصدي من الناس والآراء والناس تقولك أيوة او لا".

وأوضح: "أنا لا اناشد وزارة الكهرباء ولا وزارة البترول لأن الاتنين ملهمش دعوة بهذا الامر خالص؛ الموضوع في ايد مجلس الوزراء هو اللي هيحدد الإمكانيات والقدرات وعلى أساسه السيد المحترم وزير الكهرباء عنده محطاته جاهزة تنور أفريقيا ولكن محتاج وقود؛ السيد وزير البترول ممكن يشتري طاقة من أي مكان ولكن محتاج فلوس".

وذكر: "ارجوكم الأيام القادمة حضراتكم ادونا جدول كويس وانتوا شفتونا احنا ناس كويسة جدا؛ وياريت لو عملتوا مفاجأة لطيفة أنه لما تتقطع تبقي وقت قصير أو يوم أه ويوم لا؛ على فكرة متأجلش كتير عشان هنعرف هنعرف؛ خليني أوضب نفسي وأوضب حياتي؛ المصريين بيعملوا حاجات كتير في رمضان؛ اليوم بيبقي مليان حاجات وزحمة في الشوارع وأرجوكم ريحوهم".

وتقوم الحكومة بتخفيف احمال الكهرباء منذ عدة أشهر بسبب وجود أزمة في توفير الوقود اللازم لتشغيل محطات الكهرباء.