عمرو أديب عن تعيين حسام حسن: "إحنا جايبين مدرب ولا مدير مدرسة؟"

أكد الإعلامي عمرو أديب؛ ان تولي حسام حسن قيادة المنتخب الوطني يعد اختيار الجمهور المصري الذي ألح كثيرا على توليه هذا المنصب.

وقال أديب خلال برنامج "الحكاية" المذاع على قناة "أم بي سي مصر": "حسام حسن هو اختيار الجمهور المصري ولازم نعرف أنه جه نتيجة زن الجمهور؛ اللي بيقولوا هاتوه هو ده اللي هيربيهم وهو ده اللي هيمشيهم وده اللي عنده روح هو إحنا جايبين مدرب ولا مدير مدرسة".

وأضاف: "احنا جايبين حد عنده خطط وأساليب تدريب؛ الراجل ده جاي يلعب أربع متشات فأرجوكم الماتشات وكأس العالم وأنك توصل وبتاع ملوش علاقة لا بالروح ولا الحماس ولا أنك مصر".

وتابع: "متحملوهاش جميلة أنه هيعامل صلاح كويس؛ طبيعي تعامل صلاح وغير صلاح كويس هي جميلة أنك هتلاعب أحسن لاعب في تاريخ مصر كويس؟ ده صلاح في لاعيبة ليها وزن زي رونالدو في البرتغال وميسي في الارجنتين مينفعش تجيبه وتقوله أنت زي الجميع".

وواصل: "مشكلة حسام وإبراهيم إيه؟ أنت تحت الضغط يظهر أسوأ ما فيهم ولما تكون مدرب لمنتخب مصر لازم تعرف أنه تحت ضغط بين مش لما يحصل حاجة في ماتش هتجيب الطوبة وتروح تضربهم؟ الراجل دة بقي مدربنا ولازم نحسن له النصيحة ولازم تعرف ازاي تتعامل تحت الضغط".

وأوضح: "الصفات الثابتة في الظروف المتغيرة أنت مشكلتك جواك مش براك مدرب منتخب مصر غير مدرب المصري أو الزمالك أو الإسماعيلي أنت في مكانه تانية خالص وبتتعامل مع لاعيبة تانية خالص".

وأعلن الاتحاد المصري لكرة القدم عن تعيين حسام حسن مديرا فنيا للمنتخب الوطني خلفا للبرتغالي روي فيتوريا والذي أقيل بسبب سوء النتائج في بطولة الأمم الافريقية.

وكان اتحاد الكرة قد أعلن إقالة فيتوريا عقب الخروج من دور الـ 16 لبطولة كأس أمم إفريقيا 2023 في كوت ديفوار، وذلك بركلات الترجيح على يد الكونغو الديمقراطية.

وتقدر قيمة الشرط الجزائي في عقد فيتوريا براتب 3 أشهر من قيمة راتبه وقيمته 200 ألف دولار شهريا وهو ما يعني أن الشرط الجزائي يصل إلى 600 ألف دولار.