أول تعليق من عم ربيع الفكهاني بطل مشهد "برتقال غزة": "ياريت كان عندي أحسن"
قال ربيع أبو حسن، بائع فاكهة والذي ألقى كميات من البرتقال على شاحنات الإغاثة المتجهة إلى غزة أثناء مرورها أمامه أنه رغب في أن تصل هذه المساعدة البسيطة إلى سكان القطاع.
وقال ربيع برنامج "الحكاية" المذاع على قناة "أم بي سي مصر" والذي يقدمه الإعلامي عمرو أديب: "كنت بروح البيت اسمع في التلفزيون وأول ما جاتلي الفرصة حسيت ان حاجة من ريحتهم جات نحيتي وكنت بدي للسواقين في الكابينة برتقال وأقولهم كلوا من ده وبلاش تاخدوا اللي من ورا وياريت كان عندي أحسن من كدة".
وأضاف: "من اول الصعيد لاخر بحري بيرنوا عليا بعد اللي حصل وفي ناس من السعودية وبيجيبوا رقمي ويكلموني وأنا سعيد بشكرهم ليا؛ واحد فلسطيني كلمني بيقولي بندعيلك ياعم ربيع وقلتله والله أنا كل يوم قبل ما أنام بدعيلكم كتير".
وتابع: "أتمنى من ربنا أن البلد تعمر وبيوتهم تتبني ويربوا عيالهم وكفاية كده؛ أنا قاعد على الكوبري في الشارع عند محطة الحوامدية؛ أنا في الحتة دي من سنتين وكنت في البدرشين قبل كدة ونقلت".
من جهته أشاد الإعلامي عمرو أديب ببائع البرتقال مشيرا إلى أنه قام بعمل مشرف على قدر إمكانياته مطالبا إياه بأن يعبر عما يرغب فيه من أجل تحقيقه.
وذكر أديب: "يعني لو عملنالك دكان أو كشك في المنطقة دي يبقي كويس يا عم ربيع؟ هي الجدعنة دي بفلوس؟ هنشوف حد يشوفلك دكان لأن الجدعنة والشهامة دي لازم حد يقف جنبها؛ حاجة محترمة وهو دا المصري وهو ده الكلام".
وأوضح: "أحد رجال الاعمال وعد أن هيوفر محل لعم ربيع؛ وكمان في رحلة عمرة من رجل الاعمال أشرف شيحة ودا معلم الحج والعمرة في مصر؛ ولو عايز حج ياعم ربيع هنحججك كمان؛ لا رحلة حج يا عم ربيع وهتبقى الحاج ربيع".
وانتشر مقطع مصور لبائع فاكهة خلال القائه بكميات من البرتقال على الشاحنات المارة أمامه والمتجهة إلى قطاع غزة من أجل إيصال المساعدات إلى القطاع المحاصر.
ويمنع الاحتلال الإسرائيلي الماء والغذاء والوقود والأدوية عن سكان القطاع المحاصر قبل أن يسمح بدخول اعداد محدودة من شاحنات المساعدات.
