أحمد موسى يعلق على شائعات بيع قناة "صدى البلد"

علق الإعلامي أحمد موسى؛ على الشائعات التي اشارت إلى بيع قناة "صدى البلد" والتي يملكها النائب محمد أبو العنين عضو مجلس النواب.

وقال موسى خلال برنامج "على مسؤوليتي" المذاع على قناة "صدى البلد": "امبارح باليل كدة ناس بتبعتلي؛ معقولة أنتوا بعتوا القناة؟ السوشيال ميديا أصبحت مكان موبوء للشائعات؛ اخبار وشائعات دائما كاذبة؛ صدى البلد ليست للبيع والنائب محمد أبو العنين عمل هذه القناة عشان مصر وهتفضل عشان مصر".

وأضاف: "بشكر الناس اللي كانوا منزعجين جدا؛ حتى في تعليقاتهم لما كتبت امبارح باليل؛ عايز اطمن حضراتكم؛ عندنا اتخذ النائب محمد أبو العنين القرار أن يكون عنده هذه الشبكة 3 قنوات مع المواقع مؤثرة جدا؛ دورها الأول والأخير مصر وشعبها العظيم".

وتابع: "هذا امر ميعجبش الناس اللي بيكرهوا مصر؛ سواء اللي وسطينا جوة أو اللي هربانين برة؛ دول بيكرهوا أي حد واقف مع البلد وعشان كدة تتعرض قنوات صدى البلد لهجمة شرسة على مدار الساعة؛ في قنوات مش موجودة ولا حد بيتكلم عليها واعلاميين ولا حد بيجيب سيرتهم ابدا أكنهم مش موجودين".

وأوضح: "هما يركزوا على هنا بشكل أساسي؛ هذه القناة بتتعرض لحملات منذ عام 2013-2014؛ بعد شهر من دلوقت هنكون كملنا 10 سنوات على الهواء؛ 10 سنوات في عين الأعداء على الهواء وعلى مدار 10 سنوات بنظهر كل يوم وأحيانا نطلع الصبح أو نقعد لبليل حسب الاحداث يعني".

وذكر: "كنت كل يوم في 2014-2015 ولحد أمبارح حملة رهيبة جدا أقفلوا صدى البلد؛ مضيقاك في ايه؟ صدى البلد واقفة مع مصر ومصلحتها الدولة المصرية والقوات المسلحة والشرطة وكل مؤسسات البلد؛ احنا هنا عندنا إيمان كامل ببلدنا ورئيسنا وكل مؤسسات الدولة المصرية".

وأكمل: "إيمان ومساندة ودعم؛ الكارهين من الداخل والخارج لا يرضيهم هذا الامر؛ أنا اقف مع بلدي لحد ما أموت معندناش غير مصر وأولنا صاحب هذه القناة معندوش غير مصر ودوره الأساسي مصر وأنشأ القناة عشان تساند الدولة المصرية وتستمر في مساندة الدولة المصرية طول الوقت".

واختتم: "صاحب القناة بيعتبر القناة ابن من أبنائه؛ أيام الاخوان كانوا عايزين يخدوا القناة وقالهم موتوني ومش هتنازل عن سهم وهددوه وفبركوا وعملوا".