عمرو أديب عن تصريحات بايدن: "بتصدقوا الراجل ده بالتركيز ده؟"
أكد الإعلامي عمرو أديب؛ أن الرئيس الأمريكي جو بايدن؛ يعاني من مشكلة في الذاكرة مشيرا إلى أنه ارتكب كارثة خلال حديثه عن معبر رفح أمام الصحفيين.
وقال أديب خلال برنامج "الحكاية" المذاع على قناة "أم بي سي مصر": "الصحفيين هجموا عليه هجمة قوية وقالوله فلان بيقول عليك كذا؛ وبدأ الرجل يتحدث وعمل المصيبة الكبيرة؛ هو جاي يثبت للناس أنه بيركز فقال إن الرئيس السيسي هو رئيس المكسيك؛ ودي مش الغلطة الأولى قبل كدة أخطأ في اسم المستشار الألماني وقال إنه قعد مع الرئيس ميتران؛ المسألة بقت تريقة العالم أن المكسيك ومصر الاثنين عندهم اهرامات".
وأضاف: "في نفس الوقت كان المعلم بوتين بيعمل مقابلة وقاعد يتكلم ويقولك أنت فاكر نفسك مين؟ أحنا جامدين ومحدش يقدر يقرب لنا".
وتابع: "بايدن ليه قال كده؟ كل الناس شافت من الجزء الأول اللي هو عملنا جهود مع الرئيس السيسي رئيس المكسيك وأنه أنا اقنعته يفتح المعبر؛ اللي حصل أن هما بيتهموه وبيقولوله أنك بنتنسي؛ والراجل فضل يتكلم وهو حب أنه يعمل عظيم ومركز ولكن خبط نفسه خبطة هتلففه لفة في الانتخابات الجاية؛ لأن موضوع المكسيك ده ماشي في كل حته في العالم".
وواصل: "هو مين ممكن يتحمل اللي بيجرا في رفح دلوقت؛ مين اللي واقف على الحدود عنيه في وسط راسه ومين اللي بحساسية شديدة بيتعامل مع جانب أخر في غاية الوحشية وتيجي بعد دة كله تقول إن بايدن بيقول؛ طيب مهو قال عليه مكسيكي هو كمان".
وأكمل: "انتوا بعد كل اللي اتعم لدة معندكوش ثقة في مصر؟ قمت لقيت محطات كدة مش حاطه غير الجملة دي؛ داحنا الأربع شهور دول امتحانات؛ هو مين اللي واخد المفاوضات عنده مين اللي بيجله قادة حماس هنا في مصر أمنين مطمئنين".
وذكر: "مين اللي دولته كلها واقفة على رجل عشان الفلسطينيين ميعانوش؛ كل دة ويقولك شوفتوا مكانش عايز يفتح المعبر؛ مهو لو مكانش عايز يفتحه مكانش فتح؛ العالم كله شايف دورك وانت كمصري مش مصدق؛ بتصدقوا الراجل ده بالتركيز ده شيء غريب".
واختتم: "هو دا رئيسهم وهما اختاروه كده؛ لكن اللي عملوا امبارح هيضره ضرر غير طبيعي؛ كان بيفرد عضلاته العقلية ولكن وهو بيعمل كدة عضلاته العقلية جالها كرامب ويمكن رباط صليبي كمان".
