عمرو أديب للتجار:" لو الأسعار منزلتش لما يتراجع الدولار يبقى أنتوا حرامية"
أكد الإعلامي عمرو أديب؛ أن تراجع الأسعار يجب أن يظهر حين ينخفض سعر الدولار، مشيرا إلى أن هذا الأمر لا يحدث رغم تراجع العملة الأجنبية في السوق الموازية.
وقال أديب خلال برنامج "الحكاية" المذاع على قناة "أم بي سي مصر": "هو الدولار لما ينزل الحاجة هتنزل؟ احنا بقالنا يومين أن الدولار يترنح طيب وهو بيترنح كده الأسعار ايه؟ الأسعار تتبجح؛ طيب عايزين نتفق اتفاق بسيط لترين ونص زيت بـ 600 جنيه علبة سمنة بـ 1000 جنيه".
وأضاف: "بجيب العيش السياحي الرغيف بـ 3 جنيه واكتر؛ تقولي على فكرة بدأ يترنح من شوية من من كتير طيب لو نزل للخمسينات أشوفك في الزيت في السمنة في البيضة أم 6 جنيه؛ دا لسه ترنحه بيقول ياهادي".
وتابع: "العالم كله أسعار الغذاء فيها تنخفض طيب انت هنا إيه الأخبار؛ أنا المواطن المصري احترمتك جدا تقولي لا لا أنت غلبان لما الدولار وصل 70 جنيه أنت كتاجر متعذب متبهدل؛ الجبنه البيضا بـ 120 الجبنة الرومي حدث ولا حرج والبسطرمة ملناش دعوة بيها".
وواصل: "دلوقت بما أنه داخل على الترنح عايز من دلوقت اشوف هتعمل ايه والا أنتوا حرامية ونصابين؛ أنا كمواطن استحملتك وهو عالي طيب لما يوطى هنعمل ايه؛ أنا لازم اشوف حاجة بتحصل هو في الحالة دي متنيلين والحالة دي متنيلين مفيش حاجة حلوة؟".
وأوضح: "قلتلي العلف بتاع الفراخ والدولار طيب هينزل أهو ايه الحكاية هنكمل؟ دا الأسبوع اللي بيترنج فيه والحاجات بتزيد طيب لو شم نفسه يوم الاتنين؟ أي رقم تدخل بيه السوبر ماركت مبقاش ينفع؛ مصر كلها بتسأل ايه ده ايه الرقم ده".
وأكمل: "ماشي الظروف صعبة وأزمة اقتصادية بتاعك؛ أنما انا بحذر من دلوقت هل حسيتوا بالانخفاض بتاع الستة جنيه اللي في الدولار؟ أحنا رايحين نحية شهر رمضان وأنا أسف مش هقول لحد متاكلش في رمضان معلش مش هقول متعزمش بنتك وجوزها على الفطار في رمضان مش هقدر أقول كده؛ الناس عندها حد أدنى من الحياة يعني".
واختتم: "انتوا عارفين الناس بتجيب السكر ازاي دلوقت والا مش عارفين؟ لازم تصرف كام عشان تجيب قد ايه سكر؛ سترد الدولة أنا عامل منطقة عازلة لـ 60-70 مليون ولكن الناس دي لما بتخلص الكميات بتروح فين؟ بيروح للسوق المفتوح اللي فيه 40- 50 مليون كمان".
