عمرو أديب يسخر من مقترح رئيس حزب الوفد بشأن أموال المصريين بالخارج

سخر الإعلامي عمرو أديب؛ من اقتراح الدكتور عبد السند يمامة رئيس حزب الوفد بشأن إجبار المصريين بالخارج على تحويل 20% من رواتبهم إلى الجنيه المصري.

وقال أديب خلال برنامج "الحكاية" المذاع على قناة "أم بي سي مصر": "كان في اقتراح من السيد رئيس حزب الوفد أن المصريين بالخارج يتم اجبارهم على تحويل 20% من دخلهم شهريا وتم اقتراح كمان اسم محمد صلاح؛ أنا عجبني الاقتراح جدا على فكرة وعايز أقوله ان احنا كمان ممكن نجبرهم ان كل واحد فيهم يتبرع بكلية".

وأضاف: "المصريين بالخارج مش عارفين نعمل بيهم ايه؛ عايزين نعمل بيهم أي حاجة ممكن كل واحد يتبرع بكلية وممكن كل واحد يتبرع بجزء من الكبد وممكن لما يموت عنيه الاتنين الدولة تخدهم في بنك العيون".

وتابع: "كان حظ البلد وحد أن الدكتور يمامة مبقاش رئيس لأنه لو كان رئيس كان هيبقي حلول زي دي كتير في الازمة الاقتصادية اللي احنا فيها بس للأسف هو خسر بنسبة بسيطة الأصوات اللي خدها الفرق بينه وبين الفائز بسيط".

وأوضح: "أنا بقوله الاقتراح حلو ياريت كمان كل واحد وهو نازل اتنين من عيالة يتبرعوا بعشرة لتر دم وياريت كما لو كل واحد منهم يكتب تعهد أن لما يرجع مصر هيتبرع بكل فلوسه للدولة لأن ده حق مصر عليه وممكن نعمل فيهم أي حاجة اللي انت عايزه؛ الناس دي مش عارفين نعمل بيهم ايه؛ ناخد منهم ايه نوديهم فين؛ موضوع الكلية دة هيبقي مفيد جدا".

وفي وقت سابق اقترح الدكتور عبد السند يمامة رئيس حزب الوفد، الهيئة البرلمانية للحزب، بتقديم اقتراح بقانون بقيام العاملين فى الخارج بتحويل 20% من دخلهم الشهري بالعملة الأجنبية إلى البنوك المصرية، مع توفير كافة الضمانات الدستورية والقانونية لحفظ حقوق العاملين.

وأعلن أنه كلف النائب الوفدى الدكتور أيمن محسب بعقد اجتماع مع الهيئة البرلمانية لتقديم اقتراح بقانون بإلزام العاملين في الخارج بتحويل 20% من دخلهم الشهري على أن يتضمن القانون كل الضمانات الدستورية التي تضمن حقوق العاملين بالخارج بجانب تسهيلات وامتيازات أخرى لتحفيزهم.