أحمد موسى يعلق على الارتفاع الجنوني للأسعار: "طبق الفول بـ 20 جنيه"

علق الإعلامي أحمد موسى؛ على الارتفاع الجنوني لأسعار السلعة مشيرا إلى أن سعر السلعة يتغير كل ساعة.

وقال موسى خلال برنامج "على مسؤوليتي" المذاع على قناة "صدى البلد": "الصويا النهاردة الطن وصل 43 ألف جنيه اللي كان بـ 24 ألف والذرة وصل 19 ألف جنيه اللي كان بـ 12 ألف جنيه؛ أسعار اللحمة وأسعار الفراخ هنا السر؛ اللحمة النهاردة الحد الأدنى 300 وتوصل معاك لحد 400 أو 420 ولو مشينا بهذا المعدل على أول رمضان هتوصل 500 جنيه وهذا أمر في غاية الخطورة لا في ضابط ولا رابط".

وأضاف: "قدام الأهرام عند مسرح جلال الشرقاوي في عربية فول جميلة جدا وتروح تعدي تجيب طبق فول وقرصين تلاته طعمية والعيش السخن الجميل وإحنا شباب كنت تدفع كام يعني؟ خمسة ستة جنيه بكلمك مثلا في 2004 أو 2005".

وتابع: "طبق الفول النهاردة اللي هو العادي جدا؛ من غير أي حاجة وكام قرص طعمية؛ القرص بقي بـ 2 جنيه طبق الفور السادة من غير أي شيء بـ 20 جنيه؛ خدلك قرصين تلاته طعمية وطبق سلطة وعيش النهاردة ده يكلفك 30-40 جنيه؛ طبق الفور بالبيض النهاردة بـ 30 جنيه".

وواصل: "الكشري النهاردة طيب؛ أنا بقولكم على الاكلات الشعبية اللي هو مفيش أرخص من كده؛ زمان كان يحطلك على علبة الكشري بصل مش عارف عامله بأيه؛ علبة الكشري كانت بـ 5 -6 جنيه تاكل ويفيض منك؛ النهاردة أصغر واحدة بعشرين جنيه والاكبر بـ 25 والاكبر بـ 30 لحد 55 جنيه؛ الـ 55 جنيه دول كانوا يجيبوا كيلو لحمة والنهاردة جايبين علبة كشري".

وأوضح: "في محلات كشري شهيرة بيديلك علبة تمنها 100 جنيه هذا هو الوضع؛ دا الشارع والسوق والمواطن؛ مفيش بيت مبياكلش كشري وحتى لو عملته في البيت عايز تروح مطعم؛ عشان تفكر بس تروح تاكل كشري بقي بكام؟ تدفع كامل".

وذكر: "زيادة جنونية في أسعار كل حاجة؛ مفيش حاجة النهاردة سعرها ثابت مفيش سلعة النهاردة سعرها ثابت اتحدي لو حد جاب حاجة امبارح وجابها النهاردة بنفس السعر هديله مكافأة هي امبارح ايه اللي حصل باليل؟ عشان الصبح تجيبها زادت ايه سواد الليل ايه اللي حصل قالك لا كل يوم ليه سعر عشان الدولار".

واختتم: "النهاردة اللبن في مصانع ألبان بدأ يخفض انتاجه؛ حد يقولك كنت بنتج 30-40 طن قلل الإنتاج عشان الازازه الفاضية اللي كنت بشتريها النهاردة بكره اشتريها الاقيها غليت".