خيري رمضان عن هزيمة المنتخب: "أوعوا تصدقوا أننا هنتغير في الكورة"
عبر الإعلامي خيري رمضان عن استيائه أداء المنتخب الوطني أمام الكونغو الديموقراطية والخروج من دور الـ 16 ببطولة كأس الأمم الافريقية.
وقال رمضان خلال برنامج "مع خيري" المذاع على قناة "المحور": "كلنا نمنا امبارح واحنا حزاني؛ اتكسرت نفسنا بسبب خروج المنتخب المصري مؤسس الاتحاد الافريقي من دور الـ 16 أمام منتخب الكونغو الضعيفة؛ مباراة بالكامل لم ينقذ حارسا المرمى أي هدف؛ كرة واحدة خبطت من زيزو في حارس المرمى وهو طالع ووصلنا لضربات الجزاء".
وأضاف: "على عمري الكبير لن يتغير شيء؛ اوعوا تصدقوا أن في حاجة هتتغير في الكورة هنفضل مشتبكين مشوا المدرب مشوا فيتوريا؛ حلينا اتحاد هاني أبو ريدة بعد الأداء المخيب في كأس العالم وأنا مش عارف احنا فرحانين اننا هنوصل كاس العالم مع 10-12 فريق من أفريقيا وجايبين هذا المدرب اللي بياخد 200 الف يورو في الشهر والعقد بتاعه بيدينا الحق أنه يفسخ العقد ويمشي مقابل أنه يدفع 3 شهور ولكن مبيديناش الحق في حاجة".
وتابع: "عشان كدة هتبقي عندك مشكلة احتمال يطالب بالدفع لحد 2026 عشان كنت قايله لو موصلتش كأس العام من 12 فريق ولو جبت أصغر لاعب في الدوري المصري هنوصل ولكن هنوصل شكلنا ايه؟ احنا في 2018 كانت الفرقة فيها كتير من دول وطلعنا الأخير في المجموعة".
وواصل: "في ناس قاعدة تقولك بص العصفورة وبيلعبوا لعبة اهلي وزمالك؛ أبو جبل مش هو السبب في الهزيمة ولا عشان ضيع ضربة جزاء ولا محمود حمادة اللي جابوه من الدار للنار وهو مش عارف هينزل يعمل ايه؛ المدرب قعد 10 دقائق موقف لاعيبة على الخط مش قادر ياخد قرار تغيير؛ المدرب بارد وفاتر ولكن هل المشكلة في فيتوريا؟".
وأوضح: "مصطفى محمد كان احسن لاعب وأبو جبل لم يختبر ومش مسؤول أنه يشوط ضربة جزاء جبن لاعب أخر أنه يلعبها ومدربه مش عارف أنه مش هيشوط ضربة جزاء؛ فأنت متخيل أن لاعب في منتخب مصر اسمه مهند لاشين فجأة تقوله تعالي العب ضربة جزاء وهو عنده عقده فقال لا".
واختتم: "أبو جبل دخل هو مطلوب منه أنه يشوط؛ متقولوش مصدش ضربة جزاء مهو كمان الحارس التاني مصدش ضربة جزاء كله في الهوا؛ واحدة قايم وواحدة هوا ومحدش صد منهم حاجة؛ وحارس المرمى متأثرش أنه رايح الأهلي ست شهور لأن دي كان لازم ترفع معنوياته؛ محمود حمادة غلبان متدبحوش اللاعيبة لانهم بذلوا أقصى جهد".
