أحمد موسى يسخر من أبو جبل: "سبعة دخلوا في الشمال ومتعلمتش؟"

انتقد الإعلامي أحمد موسى؛ الأنباء التي نشرتها وسائل الإعلام المصرية بشأن تعاقد الأهلي مع محمد أبو جبل حارس المنتخب الوطني قبل ساعات من مواجهة الكونغو في بطولة الأمم الإفريقية والتي أقيمت أمس.

وقال موسى خلال برنامج "على مسؤوليتي" المذاع على قناة "صدى البلد": "كل ما نشر اليومين اللي فاتوا عن أبو جبل والأهلي لم يصدر بيان رسمي لا من الأهلي أو من نادي البنك الأهلي؛ طيب ايه الموضوع؟ هل اللي حصل ده كان صحيحا؟ هل حد كان يقصد أنه قبل الماتش يتكلم عن أبو جبل؟ الراجل هناك ومع المنتخب ولسه القيد بعد بكرة يعني محصلش توقيع".

وأضاف: "الأهلي طلب أه؛ طلب أبو جبل وطلب محمد بسام من سراميكا وطلب علي لطفي من نادي زيد؛ الأهلي بيدور على 2 حراس مرمى كبار طيب هل كان في اتصالات وتوقيع ليلة الماتش؟ لا؛ هل موضوع زي كده توقيت اثارته غلط؟ تماما والكلام عنه غلط تماما".

يعني عندك منتخب بيلعب ويطلع في الاعلام يقولك الحقوا أبو جبل والأهلي؛ يا أخي عندك منتخب ومباراة مهمة بتدوروا على ايه؟ شوف المنتخب الأول وادعم الراجل ده الأول عشان يصد كورة من التمانية اللي اتشاطوا عليه وكلهم في الزاوية الشمال وهو بيجري ينط على اليمين؛ محدش قاله على الشمال؟ دا عامل ازازة الشوطة على الشمال ويترمي على اليمين".

وواصل: "أول كورة في الشمال جول والتانية في الشمال جول؛ بيقولك أول واحدة والتانية بعدها تتعلم سبعة دخلوا في الشمال ومتعلمتش يا أبو جبل؟ لو الأهلي عايز أبو جبل بعد اللي شفناه أمبارح لا؛ ضيعت المنتخب أمبارح؛ هيشوط في الشمال طيب أنت طيرت على اليمين ليه؟ وجاي في الاخر تقول أنا وكل دي مصايب بنتكلم عليها".

وأوضح: "أي حد يتمنى يلعب في الأهلي أو الزمالك ومفيش أي فريق يرفض انضمام أي لاعب ولكن في النهاية ليك شروط وطلبات وقبل ساعتين من ماتش فاصل بتكلموا على أبو جبل؛ هاممكم أبو جبل مش منتخب مصر؛ تشغلوا الناس وأبو جبل تركيزه والنادي الأهلي عمل".

واختتم: "كان يعمل ايه النادي الأهلي أو نادي الزمالك أو أي نادي هل دا وقته اثارة هذه الموضوعات؟".