أحمد موسى: "80% من المنتخب لا يصلح واللي جاب فيتوريا يشربه"
عبر الإعلامي أحمد موسى؛ عن استيائه من أداء المنتخب الوطني بعد خروجه من دور الـ 16 لبطولة الأمم الافريقية المقامة في كوديفوار.
وقال موسى خلال برنامج "على مسؤوليتي" المذاع على قناة "صدى البلد": "طلعنا دور الـ 16 باقدام لاعبي موزمبيق؛ عندنا شوارع في الدفاع عندنا أسوا دفاع وحراس مرمى بسم الله ما شاء الله سواء أبو جبل أو الشناوي؛ معندناش منتخب قوي".
وأضاف: "80% من المنتخب الموجود مع السلامة متشكرين؛ بقولهم شكرا عملتوا اللي عليكو اتفضلوا استريحوا؛ عايز 20% وأصعد 80% من المنتخب الاوليمبي؛ ولازم نجهزه يبقي هو المنتخب الأول؛ 80% من دور مع الاحتياطي متشكرين دا لو عايزين نبدأ صح".
وتابع: "معندناش وقت للراحة ومعندناش رفاهية هنعمل؛ فيتوريا لا يليق بمنتخب مصر؛ واللي جابه يتحمله يشربه؛ اللي اتعاقد مع فيتوريا يشربه سواء كان حازم أمام او غير حازم أمام؛ لا حازم إمام على راسه ريشه ولا غيره؛ حازم امام خدعنا وضحك علينا؛ بيديله 200 الف دولار لية في الشهر؟ أمال كيروش يستاهل كام؟ وكوبر يستاهل كام؛ لا مقارنة بين مدرب محلي؛ دا مدرب ضعيف جدا".
وواصل: "دا منزل لاعب اسمه حمادة؛ لحد ما نزل امبارح معرفش هو بيلعب فين ولسة عارف من 50 دقايق؛ ضيع كورة كانت تخلص الماتش وتودينا دور التمانية؛ ياجماعة في مجاملات ودي اللي مضيعة الدنيا والطبطبة مضيعة المنتخب".
وأكمل: "مفيش إقالة للاتحاد وبقولك من الاخر؛ هما لو عايزين يستقيلوا ياريت ولكن محدش هيقيلهم لأنك لا تملك هذا الامر؛ ولو قرروا الاستقالة عظيم؛ حصلت في 2019 على طول في نفس اليوم الاتحاد استقال قبل ما الناس تروح كانوا مقدمين استقالتهم؛ هل يعملوها النهاردة قبل طلعة الشمس؟ أتمنى الباب مفتوح".
واختتم: "في انتخابات بعد 6-7 شهور فيعني أنت هتيجي النهاردة تقيل الاتحاد وبعدين تجيب لجان ووجع قلب؛ أنا عايز اهد والا أبني؟ اصلاح المنظومة البناء ونبني صح ونختار صح؛ احنا معندناش حد في أفريقيا ندور على اللي يبقي لينا النماذج الموجودة في أفريقيا ونافذة في القارة اشتغل عليه ويبقي موجود معاك".
