عاجل| مصطفى بكرى يفجر مفاجأة على الهواء بشأن سعر الدولار

أكد الإعلامي مصطفى بكري؛ أن الدولة المصرية تعمل حاليا على القضاء على السوق السوداء وتوحيد سعر صرف العملة الأجنبية.

وقال بكري خلال برنامج "حقائق وأسرار" المذاع على قناة "صدى البلد": "أنا بقول كلام عن مصادر مهمة؛ لازم نقضي على السوق السوداء يعني يبقي عندنا سعر موحد للعملة الصعبة وعشان دة يحصل لازم يكون عندنا سيولة دولارية كبيرة في البنك المركزي تخليه يضمن توحيد سعر الصرف".

وأضاف: "احنا عندنا التزامات وفوائد واستيراد للمواد الغذائية ومستلزمات الإنتاج عندنا أرباح الشركات الأجنبية اللي عاوزه تخرجها وعندنا تراكمات لرصيد شركاء أجانب في البترول لازم تسدد وكل ده بيلقي على الدولة أعباء كبيرة".

وتابع: "مصر عمرها ما تخلفت عن السداد؛ الرئيس مبيطلش اجتماعات مع كافة المسؤولين المعنيين؛ وأنا عايز اقولكم زي ما قلت من 3 أسابيع؛ لن تمضي فترة قليلة قبل شهر أبريل القادم إلا وهيكون لدى الحكومة إيراد كبير من العملة الصعبة يمكن البنك المركزي من حل المشكلة والقضاء على السوق السوداء".

وواصل: "لن تمضي أسابيع قليلة ألا وهيكون عندنا سيولة هتتحط في البنك المركزي هتعملنا توازن بين السوق السوداء والبنوك؛ إذا كان الدولار وصل في السوق الموازية إلى 60 جنيه؛ في المقابل خلال فترة وجيزة هيهبط ويتهاوي لأن البنك المركزي هيدخل بكل قوة ويقضى على السوق السوداء بعد ما الدولة توفرله المبالغ المطلوبة لتوحيد سعر الصرف".

وأكمل: "عندنا فرص استثمارية متاحة بالدولار هتخلينا ننهي الازمة في أقرب وقت ممكن والكلام دة لا تحليلي ولا كلام بقوله دي معلومات؛ الناس برة تتساءل مصر بتدي أكبر حوافر في المنطقة المفروض يكون عندكم أكبر استثمار".

وأوضح: "الحكومة بتعمل دلوقت على ثبات الاحتياطي الاستراتيجي ومينزلش؛ هو ثابت دلوقت عند 35.5 مليار دولار في الوقت اللي بعض المؤسسات الدولية قاعدة مخصوص بتراهن علينا كل شهر أمتي مصر تقع امتي مصر تعلن افلاسها ولكن الغريب أن مصر بتفاجئهم".

وذكر: "تعليمات الرئيس للحكومة حافظوا على الاحتياطي الاستراتيجي ولكن ابتدوا بالأولويات؛ نمرة واحد سددوا الفلوس اللي مديونين بيها عشان صورة مصر وعشان ميدعيش البعض أننا مش قادرين ندفع".

واختتم: "تاني حاجة وفروا الاحتياجات الأساسية للشعب المصري وثالث حاجة اعملوا كل شيء لإدخال مستلزمات الإنتاج والزراعة".