تامر أمين يعلق على انفصال ياسمين عبد العزيز والعوضي: "مفيش حاجة بتدوم"

علق الإعلامي تامر أمين؛ على تناول وسائل التواصل الاجتماعي وبعض وسائل الإعلام لخبر طلاق الفنان أحمد العوضي والفنانة ياسمين عبد العزيز.

وقال أمين برنامج "أخر النهار" المذاع على قناة "النهار": "العنوان بيقول وحش الكون أطلقت وهنا عندي كام ملحوظة صغيرين أرجوا أن يتسع صدركم ليها؛ الملحوظة الأولى إن وحش الكون اتطلق فين الملحوظة اللي هنا؟ أن مفيش حاجة بتدوم لا حب بيدوم ولا كره بيدوم".

وأضاف: "أنت لو شفت الكلام اللي كان بيقوله العوضي وياسمين عن بعضهم خلال الخمس سنوات اللي فاتوا تحس أنهم توأم روح وأنهم هيكملوا حياتهم عصافير لحد أخر العمر؛ مفيش احلي من الكلام الحلو اللي بيتقال في الوقت الحلو والمشكلة أننا مش عاملين حساب الوقت اللي مش حلو ولما تسمع كلام حلو في الوقت الحلو اعرف أن دة كلام مؤقت مرهون بالوقت دة ولما يختلف الحال والظرف بيختلف الكلام".

وتابع: "تاني ملحوظة انا قلت لحضراتكم ارجوكم تناولوا الخبر بالشكل الخبري بس؛ الخبر أننا نقول إن  الطلاق تم رسميا ولكن في ناس كتير معملتش اللي بعمله ده كل الناس عالمواقع طيب ليه وابتدوا الناس يوجهوا ليهم أسئلة وابتدت ناس تفتي وتكتب وتقول أنا هقولكم اللي محدش يعرفه".

وواصل: "ازاي تسمحوا لنفسكم تقتحموا البيوت واسرار البيوت بالشكل ده في حين انكم متسمحوش لحد أنه يخبط على باب بيتكم ولكن عادي احنا نعمل اللي منرضاش أنه يتعمل فينا؛ ارجوكم لا تقتحموا اسرار البيوت حتى عند الطلاق نقولهم خلاص ربنا يوفقكم دون ان ندخل في النميمة".

وأوضح: "الدليل انكم أضطريتوا ياسمين عبد العزيز أنها تنزل بوست تحلف فيه بالله أن احمد العوضي مخنهاش وأن الخيانة الزوجية مش هي السبب في الطلاق؛ هي كتبت أن الراجل مخانيش من سيل الهري والشائعات اللي نزل على السوشيال ميديا فميصحش يا جماعة دي مش أشياء نهزر فيها".

واختتم: "من ساعة ما تم الإعلان عن خبر طلاق ياسمين وأحمد العوضي وكتير من الناس على السوشيال ميديا تقولك شيء لله يا ليلي عبد اللطيف؛ دورولنا على ليلي عبد اللطيف عشان نعرف توقعاتنا لمستقبلنا وللي ميعرفش أن السيدة ليلي عبد اللطيف بتعمل في مجال التنبؤات وفي أواخر عام 2023 قالت إنها تتوقع أنها في 2024 هيحصل طلاق بين أحمد العوضي وياسمين عبد العزيز".