عمرو أديب: "محتاجين خطة اقتصادية حربية والناس عايزه تشوف وجوه جديدة"
أكد الإعلامي عمرو أديب؛ أن مصر تحتاج إلى مجهود كبير من أجل أن تعود دولة طبيعية بعد الأزمات الاقتصادية التي ضربت البلاد خلال الفترة الماضية.
وقال أديب خلال برنامج "الحكاية" المذاع على قناة "أم بي سي مصر": "في 50% أننا نقدر وناس تانية تقولك لا 60 منقدرش؛ لازم مجهود عشان تعبر وتبقى دعوة طبيعية؛ حياتك طبيعية ومصاريفك تقدر توفيها ونورك ميتقطعش والطبيعية دي تقديري 50/50".
وأضاف: "صانع القرار المصري كلما اقترب من حل لقي في شروط؛ ياجماعة مفيش حلاوة من غير نار ومفيش حاجة من غير تمن؛ تيجي تقرب للصندوق يقولك أنا بتاعك وأنا معاك بس معلش في تلات أربع حاجات لازم تعملها".
وتابع: "تيجي الإدارة المصرية عندها مشاكل تقولك أنا لو عملت ده ليها أثار اجتماعية أو اقتصادية؛ مفيش حل بلا تمن والحلول اللي قدام مصر كلها لها تمن ويجب أن نأخذ الدواء المر؛ أنا ممكن افرشلك الأرض حنيه وأقولك مصر قوية ولا أحد سيسمح أن مصر تتعثر وممكن اقولك الكلام دة وارتاح أنا نمرة واحد أنما حقيقة الامر لا هناك تمن لابد أن يدفع".
وواصل: "هذه دولة تعاني من مشكلة نقد أجنبي هل دي حاجة هنناقش فيها؟ شكل السوق بيتصرف فيه نقد أجنبي ملوش لازمة أشياء كتير مستوردة داخل الأسواق المصرية سواء رسميا أو تهريبا ليست من سمة دولة عنها مشكلة عملة صعبة".
وأكمل: "الورق ملوش أي قيمة بلا تنفيذ ولا قدرات واضحة؛ أنا مبكللمكش أننا داخلين على أزمة أحنا في المنحني الان ولذلك أنت قدامك حل من اتنين ياسكة السلامة يا سكة اللي يروح ميرجعش؛ أنا اتحدث اقتصاديا مصانع قدراتها بقت النص أو الربع وناس من اللي بتصدر عندها مشكلة في الصادرات ومواد الإنتاج وكلام عن الضرائب والكهرباء للمصانع كل دة هيصب في ايه؟".
وواصل: "المسألة محتاجة خطة طوارئ حربية اقتصادية؛ اسألوا ناس جديدة الناس القديمة خلال كتر خيرهم عملوا كل اللي عليهم؛ الناس القديمة مش نافعة معانا في هذه المرحلة الصعبة؛ نحن في وضع صعب محتاجين ناس أقويا مستمرة ويشتغلوا على هذا الامر لغاية لما نطلع طبيعيين".
واختتم: "مصر تقدر طبعا تقدر ولكن مش بسهولة ولا بكرة هتاخد وقت عايز بقي تقف عند نقطة هو ايه السبب والازمة دي ازاي خليك قاعد بقي في ده أنا ببص لبكرة؛ بكرة هتعمل ايه؟ محتاجين أن الناس تشوف وجوه جديدة أنا مبتكلمش عن تعديل وزاري؛ يجب أن نرى وجوه لها فكر اقتصادي واضح يتعامل مع الأزمة".
