أحمد موسى: اللاجئون في مصر يستهلكون 8.7 من موازنة الدولة

أكد الإعلامي أحمد موسى؛ أن المنظمات الدولية تقدر أعداد اللاجئين الموجودين في مصر بـ 9 ملايين لاجئ من عدة دول.

وقال موسى خلال برنامج "على مسؤوليتي" المذاع على قناة "صدى البلد": "فتحت ملف اللاجئين وعرضت فيديوهات في 2013-2014 بتكلم عن الحكاية على بعضها؛ بعض الأصدقاء بيكلموني وبيسألوا إيه اللي بيحصل قلتلهم الناس تصبر ولازم أحيي كل مواطن ومواطنة مصرية بتدافع عن بلدها على وسائل التواصل الاجتماعي".

وأضاف: "ناس وطنية بتخاف على بلدها؛ وعشان بيخافوا على بلدهم صوتهم بيوصل؛ وعشان بيتكلموا للصالح العام صوتهم بيوصل؛ لقيت الفترة اللي فاتت اشتغل عليا حملة فوق خيالهم في الاعلام اللي بعضهم النهاردة بيتكلم كدة كانوا بيهاجموني؛ لازم احيي الدكتور مصطفى مدبولي رئيس مجلس الوزراء المحترم".

وتابع: "رئيس الوزراء عمل النهاردة اجتماع مهم جدا ضم ممثلي وزارات الدولة والأجهزة؛ عايزين وضع لتحديد وتدقيق اعداد اللاجئين الموجودين في مصر؛ المنظمات الدولية بتكلم على رقم 9 مليون؛ ممكن تكون لاجئ أو مهجرين أو ضيوف تقول اللي أنت عايزه".

وواصل: "الدولة المصرية تعاملت مع الناس الموجودين في بلدنا كمواطنين؛ هدي حضراتكم أمثلة؛ احنا عندنا ندرة في المياه؛ طيب التسعة مليون دول بيستهلكوا مايه؟ نعم عملنا طرق بيستخدموها؟ طبعا طيب دعم الكهرباء اخباره ايه؛ طيب المواد البترولية بيروح محطة البنزين بيقوله أنا سوري ولا سوداني والا ليبي والا يمني؟ لا طبعا".

وأوضح: "موازنة دعم الوقود 120 مليار جنيه؛ التسعة مليون يمثلوا 8.7 من عدد سكان مصر عايشين على ارض مصر؛ لما تيجي الدولة النهاردة بتقر الموازنة؛ مبتعملش موازنة لـ 105 مليون ولكن بتعمل موازنة لـ 115 مليون عايشين على أرض مصر".

وأكمل: "هل النهاردة لما بيروح يتعالج في مستشفى بيقوله أنت ليبي والا سوري والا سوداني؟ أكيد لا كل ما يطبق على المواطن المصري يطبق عليهم جميعا؛ بند الصحة في الموازنة رفع من 128 مليار جنيه إلى 148 مليار جنيه و8.7 من الرقم ده لأشقائنا الموجودين".

واختتم: "هو بياكل والا مبياكلش؟ بيشتري عيش والا لا؟ أنا بشتري القمح بالغالي هل أنا بعته ليه بالغالي؟".