عمرو أديب يعلق على هاشتاج مقاطعة محلات السوريين: "هتستفيدوا ايه؟"
انتقد الإعلامي عمرو أديب؛ الهاشتاج الذي انتشر مؤخرا على موقع التواصل الاجتماعي "أكس" وطالب بمقاطعة المحال التابعة للسوريين الموجودين في مصر.
وقال أديب خلال برنامج "الحكاية" المذاع على قناة "أم بي سي مصر": "أنا أخشى أن يتحول الكلام اللفظى إلى هجوم من نوع أخر؛ وبعدين أنت عايز تعمل معاهم ايه؟ ترحلهم؟ هما موجودين إقامة رسمية؛ اللاجئين دول 147 ألف ولكن انت عندك مليون ونص قاعدين؛ وأنا لما كنت طفل جارنا كان سوري وكانوا شغالين في النسيج وعلاقتنا بسوريا قديمة ولما حاربت حاربت معاه؛ ايه اللي حصل غلط؟ ايه اللي مضايقك في السوريين فجأة".
وأضاف: "هل هي مشكلتك أن الشاورما بتاعتهم مش حلوة اوي؟ تحس أنها حرب تجارية ما؛ في مناطق في مصر في التجمع وستة أكتوبر اتعمرت وشغالين؛ أنا معنديش مشكلة طول ما هو راجل محترم وماشي بالقانون؛ عايز اسال سؤال لو حد قرر يعاملكوا كدة برة رد فعلكم ايه".
وتابع: "اية مقاطعة المحلات السوري؛ هتستفيد ايه؟ هو لما يعطل مهو هيعطل ناس تانية وراه عايز تاكل شاورما مصري كل شاورما مصري عايز تاكل شاورما سوري كل شاورما سوري؛ دا شعب شغيل بيشتغلوا طول اليوم بيعملوا الشاوروما والكنافة واللبنة".
وأوضح: "الجدعنة بتاعتكم على مدى مئات السنين؛ أنت من زمان وانت بتحتضن الناس؛ انت بتبطبط أنت مصر؛ احنا في أزمة اقتصادية والناس حاسه أنها مش حمل المنافسة يقولك دا في محل في الكوربة لقيت فيه نمل مهو في محل مصري فيه نمل وفي محل في نيويورك فيه نمل".
وذكر: "أنا كنت في لندن من 6 أشهر؛ الصينيين مطاعمهم في كل حتة في العالم والمطاعم الهندي في كل مكان والمطاعم الإيراني في كل مكان؛ أنا عايز أعرف السوريين عملوا لكم ايه".
واختتم: "أنت لما بتودي عيالك برة أنت حد بيقولك أمشي؟ دانت بتروح هناك وتزبط نفسك ولو حد قربلك بتقول لا أنا محدش يكلمني أنا مواطن وليا حقوق؛ يا جماعة اللي حاطط الفيشة دي يشدها مش عشان تكسب قرشين في سندوتش شاورما البلد تبقي كدة".
