عمرو أديب: المواطن هيجيب منين والدولة مش قادرة تستحمل؟

أكد الإعلامي عمرو أديب؛ أن الأوضاع الاقتصادية الحالية يجب أن تدفع الجميع لسؤال المواطن حول كيفية تصرفه وتخطيه للوضع الحالي في حين أن الحكومة نفسها غير قادرة على تحمل الأزمة. 

وقال أديب برنامج "الحكاية" المذاع على قناة "أم بي سي مصر": "حضراتكم حضرتوا اول السنة وقرارات زيادة الأسعار في أشياء مختلفة وناس كتير قالت ليه أول السنة ما كانوا يستنوا ويقسطوها وشوفنا السيد رئيس الوزراء الدكتور مدبولي وشرح للناس ليه زودنا الأسعار".

وأضاف: "أنا حسيت ان الكلام في الأيام اللي فاتت كان عن زيادة الأسعار ويبدو أن الموضوع مطول شوية ودة كلام رئيس الوزراء اللي قال 2024 كلها ونص 2025 على ما نبتدي نتعافي ولازم نبقى واقعيين؛ وأنا بالنسبالي السنة ونص اللي بيتكلم عليها دي هو حاسبها ازاي لأن نفس رئيس الوزراء دة من شهر كان بيتكلم عن الدولار أنها أزمة عابرة".

وتابع: "هل هو حاسب الأمور دي صح أو مش حاسبها صح أنا مقدرش؛ الرجل عنده كل المعلومات والأرقام وأنا باشفق عليه من الموقف اللي هو فيه؛ 2024 أصعب من 2023 وفي سؤال محدش سأله وأزعم أن عايز اساله بهدوء ومحدش يفهمني غلط".

وأكمل: "احنا كنا في 2023 بنسأل الحكومة احنا رايحين فين؟ وكانت الحكومة دايما بترد الشهر الجاي اللي وراه لا هنتحسن ونبقى كويسين؛ الأمور مش محتاجة يعني وكان باين ان في أزمة لاسباب كتيرة؛ انا رايي في 2024 يجب أن يتسأل السؤال للمواطن؛ أنت هتعمل ايه؟".

وواصل: "كل مسؤول في مصر طلع برر وقالك أنا هضطر أزود عشان كذا ورئيس الوزراء قالك أحنا شايلين شيلة كبيرة اوي؛ انا كمواطن اعمل ايه؟ اجيب منين؟ دا سؤال مهم جدا محدش سأله أنت كدولة بجلالة قدرك بتقول انا مش قادر أنا مش هشيل أكتر من كده طيب المواطن يقول ايه".

وأوضح: "في 2024 السؤال للمواطن هتجيب منين؟ في ناس بتقولك استحمل إذا كنت أنت كحكومة مش مستحمل؟ أنا هجيب منين أنا هعمل ايه؟ أنا هصرف ازاي؟ يجب أن احنا نفكر في السؤال ده دا سؤال 2024 وعلى فكرة لسة في أسعار تاني هتزيد؛ ومش أنا اللي قلت وفي الغالب الدولار لو نزل مش هينزل كتير".

واختتم: "لما الدولار بينزل الأسعار مبتنزلش؛ عندك دولار عالي وأسعار غالية وظروف صعبة؛ هتعملوا ايه؟ هتعمل للمواطن ايه؟".