عمرو أديب يشكر باسم يوسف على إنقاذ شقيقه بعد تعرضه لأزمة قلبية

وجه الإعلامي عمرو أديب الشكر لكن ما ساعد شقيقه عماد الدين أديب بعد تعرضه لأزمة قلبية خلال إدارته جلسة في أحد المؤتمرات التي أقيمت في دبي.

وقال أديب برنامج "الحكاية" المذاع على قناة "أم بي سي مصر": "في مسألة شخصية بس عايز أتكلم فيها عشان أشكر ناس؛ من يومين تلاتة أخي عماد الدين اديب كان في المؤتمر الاستراتيجي في دبي وفي الجلسة دي سأل سؤال وقال ممكن تجيله ازمة قلبية لو معرفش الإجابة وبعد أربع دقايق من الجملة دي عماد جاتله شبه أزمة قلبية".

وأضاف: "عايز أشيد بهذه الدولة المحترمة اللي كان فيها عربية اسعاف مجهزة للحالات الطارئة وتم نقل عماد أخويا إلى مستشفى راشد في ظرف 7 دقائق ولولا جاهزة الإسعاف وهذا المستشفى العظيم ومدير المستشفى عمل بنفسه إنعاش لقلب عماد اللي توقف لمدة دقيقة".

وتابع: "عايز اشكر الشيخ محمد بن راشد حاكم دبي على الاهتمام باخويا وعايز أشكر الوزير أنور قرقاش اللي بيروح كل يوم المستشفى والوزير محمد جرجاوي وبيذهب يوميا للاطمئنان على عماد؛ عماد مواطن مصري والشهامة والجدعنة من أهل الامارات ليست جديدة ويجب أن أشكر أصدقاء مصريين سخرهم القدر أنهم يكونوا موجودين".

وأكمل: "الدكتور باسم يوسف وهنا بقول دكتور لانه هو طبيب في الأصل وهو نفس باسم يوسف اللي تعرفوه؛ باسم يوسف قام على الفور وقال لازم يتنقل وطلب الإسعاف؛ وعايز أشكر أيضا الأخ أحمد عباس والإعلامي معتز بالله عبد الفتاح؛ التلاتة دول عملوا مجهود كبير جدا ووقفوا جنبه اكتر من اخواته".

وأوضح: "باسم يوسف واحمد عباس كانوا بيتصلوا بيا كل عشر دقائق ولم يتركوه إلا بعد ما تأكدوا أنه دخل المستشفى وعدم الدعامة؛ أنا بشكر كل الناس اللي اهتموا باخويا وهو زي أبويا بالزبط والحمد لله هو محاط بالعائلة هناك وبشكر كل الناس اللي اتصلت تسأل وتطمن".

واختتم: "عماد من الشخصيات المحبوبة المحترمة اللي ليها كثير من المعجبين؛ بشكر دبي ودولة الامارات وأنت بتشوف مظاهر رقي دولة هذا الرجل كان يمكن ان يكون مصيره أخر لولا هذا الاهتمام؛ علاقتي انا وباسم ليست جيدة جدا ولكن أكن له كل الاحترام على هذا اللي عمله وأنا اظن أن هذا الموقف هشيله لباسم دين في رقبتي ".