مصطفى بكري: "الناس بتعاني خففي إيدك يا حكومة"
انتقد الإعلامي مصطفى بكري أن هناك زيادة كبيرة في أسعار السلع والخدمات مشيرا إلى أن بعض الاسر من الطبقة المتوسطة أصبحت غير قادرة على تلبية احتياجاتها.
وقال بكري خلال برنامج "حقائق واسرار" المذاع على قناة "صدى البلد": "الأسعار بقت نار؛ النهاردة أن غليت خمس ست سلع شوف السوق بيحصل فيه ايه؛ شوف التجار بيعملوا فينا ايه؛ شوف الناس المحتكرين بيسوا أمورهم معانا ازاي وعلى حسابنا ازاي؛ شوف المواد الغذائية وصلت ليه؛ الناس مش عايزة حاجة الناس عايزة الستر".
وأضاف: "عايز أما أبني يبقى محتاج حاجة أقدر اجبهاله؛ عايز لما بيتي يبقي محتاج كيلو لحمة أقدر اجيبه؛ عايز أدفع فاتورة الكهربا وأودي ابني المدرسة واركبه مواصلة توديه زي الناس وعايز أروح شغلي وادفع إيجار البيت؛ أنا بقول للحكومة احسبي الحسبة دي أكيد 5 أو 6 اضعاف المرتب".
وتابع: "أنا مقدر أشياء كثيرة جدا في البلد ومقدر أوضاع بعضها مسؤولين عنه وبعضها غير مسؤولين عنه؛ ولكن بردو الجانب الاجتماعي اللي أوصى بيه الرئيس أكتر من مرة؛ النهاردة لا تقدر تقلي طبقة متوسطة؛ الكل بيعاني؛ حجم المعاناة صعب على الناس".
وواصل: "البلد دي الشعب بتاعها عظيم ووطني؛ وقت الجد بنلاقيه ولكن مينفعش كدة كل وزير يشتغل بمزاجه ويدي القرارات اللي هو عايزها".
وأوضح: "احنا مع الشعب ومن الشعب وكل شهر بروح بلدنا في قنا وشايف حالة الناس وشايف أن فيب ناس كانت مستورة ومبقتش مستورة؛ الناسي تعبانة ولكن والناس تعبانة بنقول للحكومة خففي أيدك ولازم نقرا بردو المشهد بأكمله".
وأكمل: "محدش ينكر أن البلد بتمر بتحديات خطيرة جدا؛ في تحديات أساسية بتحكم مسارنا الاقتصادي والاجتماعي؛ التحدي الأول هو الأوضاع العالمية اللي ظهرت بعد كورونا والحرب الروسية الأوكرانية؛ كنا وصلنا لمعدل نمو 5.6 وتراجع التضخم والبطالة ودة يدل ان السياسة كانت ماشية كويس ولكن جات كورونا بدأنا ماسكين نفسنا وبعدها الحرب الروسية الأوكرانية واللي حصل في حاجات عملتلنا مشكلة ".
واختتم: "التضخم موجود في كل مكان روح في أي عاصمة في أي دولة هتلاقي في تضخم".
