نشأت الديهي يهاجم بيان وزارة الصناعة: "هو والعدم سواء"

انتقد الإعلامي نشأت الديهي؛ البيان الصادر عن وزارة الصناعة بشأن الإنجازات التي تمت خلال الفترة الماضية مشيرا إلى أن البيان هو والعدم سواء.

وقال الديهي خلال برنامج "بالورقة والقلم" المذاع على قناة "تن": "عايزك تقولي رقم واحد يا معالي الوزير؛ وزارة الصناعة وقطاع الصناعة شارك بقد أيه بالناتج المحلي الإجمالي؛ هتقولي 17% هقولك على راسي هو كان كام السنة اللي قبلها هو كان كام السنة اللي قبلها كان 16% وأنت زودت 1% هقولك متشكرين كان 17% وانت حافظت عليه هقولك معملتش حاجة لو كان 18% وأنت خليه 17% هقولك ضيعت الدنيا".

وأضاف: "ما لا يمكن قياسه لا يمكن مراقبته؛ أنا التقرير اللي قدامي عن إنجازات وزارة الصناعة هو والعدم سواء لأنه مجاوبليش عن أقل عدد ممكن من المعلومات؛ بقول لحضرتك أنت عملت كام مصنع؛ النهاردة أنا عايز اعرف كام مصنع تم إنشائه وكام مصنع اشتغل وأضاف للإنتاج قد ايه وقلل فاتورة الواردات قد ايه والمدخلات بجيبها منين".

وتابع: "يا معالي الوزير يا دكتور قطاع وزارتك نشاطك المهم الصناعة ساهم في الناتج المحلي الإجمالي بقد ايه كان كام وبقي كان وقيمته الاجمالية قد ايه اديني ارقام أقدر افهمها وأقولها ونراقب بعض".

وواصل: "مشروع توطين الصناعة طيب صدرنا بقد ايه؛ اللي أنت قلته ساهم بالتصدير كان كام وبقت كام قولولنا ارقام نقدر نفهمها ونقتنع بيها ونشرحها للناس؛ احنا عندنا جواهر من المشروعات وللأسف المسؤول مبيقولش ولما يعملك تقرير أو بيان بيرميه في وشك".

وأوضح: "أنت فاهم والناس اللي حواليك فاهمين؛ أنا مش فاهم أنا لا أهاجم الوزير لا دوري ولا أسلوبي احنا عايزين نخدم السياق العام والسياق بيقول عايزين نعمق الصناعة ونعمل صناعات عشان منستوردش واشغل العمالة وأصدر".

وذكر: "كل الكلام في التقرير لم يجيب على كل الأسلحة عايز أعرف كام مصنع اشتغلوا 200-300 صدرنا بقد ايه؟ وساهم في الناتج المحلي قد ايه؟ ياجماعة لازم نحب الصناعة والاستثمار والتصدير والرقابة والمتابعة".

واختتم: "احنا مش هنتطور غير كدة احنا مش عايزين نضيع الحلم بتاعنا ومشروعنا يقف مش عايزين التشريعات والبنية التحتية اللي عملناها تبقى محلك سر؛ اللي أنا فهمه وعارفه ومقتنع بيه هذه الدولة ورئيس الجمهورية اللي مش هينجح معاه مش هينجح".