أحمد موسى: "أجهزة الدولة شغالة على الدولار.. هنجيب السوق السوداء الأرض"

أكد الإعلامي أحمد موسى؛ ان السوق الموازية للعملة الأجنبية أصبحت تجارة رائجة مشيرا إلى أنها عادت بعد أن قضت عليها الدولة في وقت سابق.

وقال موسى خلال برنامج "على مسؤوليتي" المذاع على قناة "صدى البلد": "الدولة النهاردة أجهزتها كلها شغالة على الدولار؛ بكلم امبارح صديق عزيز بقوله الدنيا ايه قالي أحنا دلوقت متفرغين للدولار وهنجيب السوق السوداء الأرض؛ في القهاوي هتلاقي قاعدين بيتابعوا في والشوارع بيتابعوا".

وأضاف: "توجيه ضربات شديدة للسوق السوداء وكل أجهزة الدولة شغالة على الموضوع ده وكله شغال على الدولار والسوق السوداء وطول ما عندنا سوف موازي هتفضل عندنا أزمة".

وتابع: "كان عندنا سوق موازي وتم ضربها ورجعت تاني لأسوأ مما كانت عليه؛ بقيت تجارة العملة النهاردة تجارة وهي فيها سجن وعقوبة تصل إلى 10 سنوات وممكن تاخد الحد الأقصى من العقوبة ومصادرة الأموال".

وواصل: "صادروا أموال كتير الأيام اللي فاتت ولسة بيمسكوا وهيفضلوا يواجهوا؛ ولازم تفضل قلقان طول مانت عندك دولار برة البنوك الرسمية؛ أي حد بيتاجر برة في العملة على طول بيترصد؛ أنا بقول معلومات النيابة العامة كلها شغالة تحقيقات مع اللي بيتاجروا في الدولار".

وأوضح: "دا رزق داخل؛ أنت بتقبض عليه تعمله قضية وتوديه محكمة وتصادر الفلوس؛ القانون بيقول كده أي حد يتعامل خارج الجهاز المصرفي يتم اتخاذ الإجراءات القانونية؛ في أزمة كبيرة وسبب الازمة هو اللي بنتكلم عليه السوق الموازي".

وأكمل: "بقى في تجارة وناس بتتحكم وتحرك؛ وأنا دولة واجهت قبل كدة ودولة لازم أواجه والدولة تكشر عن انيابها في هذا الملف وأي ملف بيأثر على الناس لأن ده بيأثر عليك وعلى السلع؛ كل شوية يقولك الدولار مش موجود ولكنه موجود في السوق الموازي وموجود في البنوك والدولة بتوفره للاحتياجات عايز دواء أو مدخلات أنتاج".

وتعاني البلاد من أزمة في النقد الأجنبي منذ اندلاع الحرب الروسية الأوكرانية في فبراير 2022.

وتراجعت قيمة الجنيه في البنوك الرسمية والسوق السوداء أمام العملة الأجنبية حيث سجلت قيمة الدولار مستويات غير مسبوقة كما ارتفع التضخم أيضا إلى مستوى قياسي.