إعلامي ينفعل على الهواء بعد تلقيه رسالة بزيادة فاتورة المحمول

عبر الإعلامي سيد علي؛ عن استيائه من زيادة شركات الاتصالات لقيمة بعض خدماتها، مشيرا إلى أن الوضع الحالي لا يستدعي أي زيادة جديدة.

وقال على خلال برنامج "حضرة المواطن" المذاع على قناة "الحدث اليوم": "أنا دلوقت على الهوا وانا شغال؛ جايلي رسالة من شركة الموبايل اللي أنا مشترك فيها أنهم زودوا الاشتراك بتاعي؛ أنا مشترك بـ 300 على سبيل المثال هيكون 350؛ انا بدفع 2000 جنيه كل شهر".

وأضاف: "أنا بس السؤال بجد؛ شركات الاتصالات هو ايه اللي غلي عندها عشان ترفع الأسعار؛ شركات الاتصالات والجهاز القومي للاتصالات ايه اللي غلي عندكم؛ أنتوا بتعملوا أرباح قد كده؛ طالعين نازلين زي المنشار ولكن ازاي محطش ايدي في جيب المواطن".

وتابع: "شركات الاتصالات دلوقت بترفع الأسعار ليه؟ والجهاز القومي للاتصالات ازاي بيوافق ليهم برفع الأسعار؛ والا يكون الهوا ده بيشتروه بالدولار بقي بتوع الدهب بيحددوا سعر والحديد بيحددوا سعر وكل واحد بيحدد سعر وأنا كمواطن قاعد بتلطش من كل حد".

وواصل: "النهاردة الدكتور مصطفى مدبولي قالك النهاردة السبع سلع استراتيجية بيستخدمها السواد الأعظم من الناس ولكن في حاجة تانية يا دكتور مصطفى؛ روح القانون؛ الشركات والهيئات دي لازم يكون عندها شعور بالواقع؛ احنا شايفين الدولة والاسعار والدولة بتزود المعاشات وتيجي تزود الموضوع ده".

وأوضح: "يجي حد يقولك مش محتاج الموبايل وهرميه ولكن للأسف كل حياتنا بتدار بالموبايل وجزء كبير من عمرنا يدار بالموبايل؛ طيب نعمل ايه؟

ووافق الجهاز القومي لتنظيم الاتصالات على رفع أسعار كروت الشحن الفكة في مصر، بنسبة تصل لـ 10%.

وكانت شركات المحمول المقدمة لخدمات الاتصالات في مصر قد تقدمت بطلب إلى جهاز تنظيم الاتصالات للموافقة على رفع أسعار خدمات المحمول لمواجهة زيادة التكاليف في ظل زيادة الأسعار وارتفاع سعر الدولار مقابل الجنيه، ولكن لم تتم الموافقة على مثل هذه الطلبات حتى الآن.

وتم التطبيق الفعلي لزيادة أسعار كروت الشحن الفكة في مصر بداية من يوم الخميس 28 ديسمبر الجاري وسط استياء من عملاء الشركات الذين يعتقدون أن سعر الخدمات مرتفع بالفعل.