أحمد موسى يعلق على قرارات الحكومة بشأن إجراءات ضبط الأسعار: بداية لحل الأزمة

أكد الإعلامي احمد موسى؛ أن قرار الدكتور مصطفى مدبولي اليوم بشأن إجراءات ضبط الأسعار تعد بداية للقضاء على الأزمة الحالية.

وقال موسى خلال برنامج "على مسؤوليتي" المذاع على قناة "صدى البلد": "رئيس الوزراء النهاردة الدكتور مصطفى مدبولي؛ اتخذ قرار أعلن عنه اليوم؛ 7 سلع استراتيجية وهي السكر والأرز والمكرونة والفول والزيت والجبن الأبيض وهذه السلع ربما خلال أيام هنلاقي زجاجة الزيت وكيس الفول مكتوب عليه السعر".

وأضاف: "السبع سلع دول خلال التموين بتجهز وقعدوا كتير أوي مع المنتجين والقطاع الخاص؛ مش معقول اللي بتعملوه في البشر؛ حان الوقت من اليوم ودا بيعني أن في قانون يطبق فورا".

وتابع: "لازم الحاجات تخرج وتنزل السوق فورا لأن عدم نزولها السوق معناه ارتكاب جريمة؛ ورئيس الوزراء قال وزارة العدل بتعمل تعديلات لمشروع قانون تشديد العقوبات؛ أنا بتكلم في مصالح الـ 100 مليون وبقالنا فترة طويلة بنتكلم عن أسعار مشفنهاش قبل كدة".

وواصل: "السلعة لو بعشرين توصلك بـ 50 أو مفروض توصلك بـ 30 توصلك بـ 60؛ النهاردة رئيس الوزراء قال خلاص بقي كفاية واحنا هنا مفيش تسعيرة جبرية خالص؛ احنا اقتصاد حر وسوق حر ودولة بتحترم الدستور ولكن السعر استرشادي".

وأوضح: "قعدوا مع المصنعين والتجار والجهات المعنية جلسات كتيرة أوي نوصل ازاي لحل؟ نحدد بقي يبقي حضرتك اللي حددت مش الحكومة؛ حضرتك كمنتج أو تاجر أنتوا اللي حددتوا السلعة دي بكذا".

وأكمل: "علبة اللبن بعشرين أو بـ 25 مش بأربعين جنيه؛ محدش عايز حد يخسر وكمان مش عايزين حد يتاجر بالناس؛ كانت سنة صعبة والاسعار في كل حاجة زيادة والحكومة بدأت تاخد الإجراءات والإجراءات مش بفرض سعر ولا أحد يملك فرض تسعيرة جبرية".

وذكر: "السوق عرض وطلب ولكن الدولة لازم تاخد إجراءات؛ حكومة ورئيس مجلس الوزراء لما يلاقي سلعة بتختفي من السوق يبقي لازم يكون في تحرك وبداية النهاردة هي بداية القضاء على الأزمة اللي بنعاني منها حاليا".

وأصدر مجلس الوزراء اليوم عدة قرارات لضبط أسعار السلع الأساسية والاستراتيجية التي يستهلكها المواطن.

وتبدأ وزارة التموين والتجارة الداخلية، تنفيذ القرار الخاص بكتابة أسعار المنتجات على 7 أصناف أساسية بداية من الإثنين المقبل بداية شهر يناير 2024.